खोज

लमही, ४ बैशाख । जिल्लाका केही विद्यालयहरूमा शैक्षिक गुणस्तर सुधार गर्न शिक्षक कर्मचारी र जनप्रतिनिधिका बालबालिकाहरूले सरकारी विद्यालयहरूमा पढ्नुपर्छ भन्ने अभियान शुरु गरेका छन् । गढवा गाउँपालिकाको वडा नम्बर ६ ले पनि फरक तरिकाले अभियानलाई शुरु गरेको छ । आईतबार गढवा गाउँपालिका वडा नम्बर ६ का सबै विद्यालयहरू, जनप्रतिनिधि र वडा कार्यालय एकजुट भएर पञ्चेबाजा बजाउँदै सरकारी विद्यालयहरूमा विद्यार्थी भर्नाको आव्हान गरिरहेका छन् ।

‘बोर्डिङमा पढ्न नै गाह्रो छ, मलाई त सरकारी प्यारो छ । बोर्डिङमा पढ्दिनँ–म त सरकारी स्कूलमै पढ्छु ।’– भन्ने गित र पञ्चैबाजाको रौनकताले आइतवार गढवाका गाउँ–गाउँ र बजारमा नौलो अभियानको रौनकता छाएको आभाष भल्किन्थ्यो । सबै बालबालिकाको विद्यालयमा सहभागिता, गुणस्तरीय शिक्षा प्राप्तीको सुनिश्चितता भन्ने मूल नाराका साथ अभियान सुरु गरिएको गढवा गाउँपालिकाले जनाएको छ । नेपाल सरकारका शिक्षक, कर्मचारी र जनप्रतिनिधिहरूले नैतिक रूपमा आफ्ना बालबालीकाहरूलाई सरकारी विद्यालयमा पढाउने अभियानलाई उत्प्रेरित गर्न यस्तो अभियान संचालन गर्न थालिएको गाउँपालिकाका अध्यक्ष यमनारायण शर्मा पोखे्रलले बताए । शिक्षा अर्जन गर्ने नैसर्गिक अधिकारबाट बालवालिकाहरूलाई कसैले पनि वञ्चित गर्न नमिल्ने र सबै शिक्षक कर्मचारी र जनप्रतिनिधिहरूले समेत नैतिक रूपमा सरकारी विद्यालयहरूमा आफ्ना बालबालीका पढाउन उनले आव्हान गरे ।

कानूनतः दवाब दिन मिल्दैन तर नैतिक रूपमा गुणस्तर सुधारका लागि सबैले सरकारी विद्यालयमा पठाउने अभियानलाई सहयोग गर्नुपर्छ–अध्यक्ष शर्माले भने । गतबर्ष गढवाका सबै सरकारी बिद्यालयहरूको कक्षा ८ को नतिजा निकै निराशाजनक आएपछि त्यसलाई निर्मम समिक्षा गर्दै यसबर्ष सबैजसो विद्यालयहरूमा अतिरिक्त कक्षा संचालन गरेपछि सबैको प्रयासबाट अहिलेको रिजल्ट सुधार गर्न सफल भएको शर्माले बतार सरकारी बिद्यालयहरूमा गुणस्तर सुधारका लागि गाउँपालिकाले थुपै्र योजनाहरू बनाएर काम गरिरहँदा सन्तोषजनक परिणाम आएको उनले बताए ।

आईतबार जनता माबि गढवाको प्राङ्गणबाट निस्किएको सरकारी बिद्यालयका शिक्षकहरू, बिद्यालय ब्यवस्थापन समिति र जनप्रतिनिधिहरूको पञ्चैबाजा सहितको र्यालीले बुद्धज्योतीरोड, बनकट्टी, थानदेउखुरी हुँदै गढवा बजार परिक्रमा गरेपछि कोणसभामा परिणत भएको थियो । कार्यक्रममा ब्यक्तिगत घटना दर्ता समयमै गर्न नागरिकहरूलाई सचेतना समेत प्रवाह गरिएको थियो । बिद्यालय जानबाट कुनैपनि परिवारले बालबालिकाहरूलाई वञ्चित गर्न नमिल्ने यदि यसो गरेको पाईएमा सेवा सुविधाहरू समेत रोकेर बालबालीकाहरूलाई पढाउने दायित्व स्थानीय सरकारले लिने बताए । पढाउनै नसक्ने बिपन्न परिवारलाई हामीले के सहयोग गर्नुपर्छ वडामा आएर गुनासो राख्नुस तर सबैले सरकारी विद्यालयमा वालबालीकाहरू पठाउनुस कार्यक्रममा बोल्दै गढवा गाउँपालिका वडा नं. ६ का अध्यक्ष बिरबहादुर आले मगरले भने ।