खोज

बुटवल, ३० चैत । रूपन्देहीको देवदह नगरपालिका खैरेनी बजारदेखि ३ किलोमिटर मात्रै उत्तर पहाडको छेवैमा रहेको ‘गौतमबुद्ध राष्ट्रिय उद्यान’ पछिल्लो समयमा स्थानीयहरूको रोजाईमा पर्ने गरेको छ । देवदह नगरपालिका वडा नम्बर ६ ज्योतिनर खैरेनीमा रहेको यो पार्कमा वि.सं. २०७६ साल जेठ ८ गते देखि १६ गते सम्म राष्ट्रिय काष्ठकला कार्याशाला समेत आयोजना गरिएको थियो । जसबाट पार्कमा अहिले काठमा कुदिएका विभिन्न आकृतिहरू रहेका छन् । विभिन्न कलाकारहरूले निर्माण गरेका यो आकृतिको कारण विभिन्न स्थानबाट मानिसहरू अवलोकनको लागि आउने गरेका हुन ।

बुद्ध सामुदायिक वनको स्वामित्वमा रहेको कुल ४ हेक्टर क्षेत्रफलमा पर्यावरण र पर्यटन प्रवद्र्धनका लागि ‘एक सामुदायिक वन एक उद्यान’ कार्यक्रम पार्क निर्माण गरिएको हो । पार्कमा खासगरी गौतमबुद्ध संग सम्बन्धीत विभिन्न काष्ठकलाका आकृतिहरू राखीएका छन् । सबै काठले कुँदीएका आकृतिमा पहेलो (सुन) रङ्ग पोतिएको छ । जसको कारण कतिपय स्थानीयहरूले सुन पार्क समेत भनेर चिन्ने गरेको पाइएको छ ।
वनमा कुहिएर खेर गएका काठ, मुढाहरूबाट सुन्दर मूर्ति बनाएर सजाइएको कारण यसले थप आकर्षण समेत थपेको छ ।

आकर्षणको केन्द्रबिन्दु रहेको सेल्फी पुल, बुद्ध वाटर फल, भुलभुले झरना लगायतका आकृतिहरू रहेका छन् । पार्क भित्र पिकनिक खानेको लागि समेत विभिन्न सेडहरू निर्माण गरिएका छन् । पार्कले पर्यटकको लागि २० रूपैयाँ शुल्क निर्धारण गरेको छ भने, शारीरिकरूपमा अपाङ्गता भएका व्यक्ति, जेष्ठ नागगरिकहरूलाई भने टिकट निःशुल्क गरिएको छ ।

देवदह नरपालिका वडा नम्बर ६ का अध्यक्ष खेम बहादुर थापा मगरका अनुसार पछिल्लो समयमा सामाजिक सञ्जाल लगायतबाट पार्कको प्रचार प्रसार भएकोमा खुसी व्यक्त गरे । उनले पार्कलाई देवदहकै गौरवको पार्कको रूपमा विकास गर्ने गरी योजना बनाइएको जानकारी दिँदै यसको लागि नगरपालिका वडा बाट के कस्तो योजना बनाएर अगाडि बढाउन सकिन्छ भन्ने विषयमा योजना बनाएर अगाडि बढ्ने समेत जानकारी दिए ।

पार्क संचालन हुन थालेपछि जिल्ला भित्र र बाहिरबाट पर्यटकहरू रमाइलो गर्न आउन थालेको अध्यक्ष टेक बहादुर रानाले जानकारी दिए । गौतमबुद्ध सामुदायिक वन अन्तर्गत रहेको यो उद्यानमा जिल्ला वन कार्यालयको सहयोगमा चेक ड्याम समेत बनाएर स–साना बालबालिकाहरूको लागि डुङ्गा समेत चलाउने योजना बनाइएको अध्यक्ष रानाको भनाइ छ ।

गर्मी मौसम भएको कारण केही समस्या भएपनि दैनिक १ सयदेखि १ सय ५० जना आन्तरिक पर्यटक पार्कमा आउने गरेको उनको भनाइ रहेको छ । जाडोको समय र पर्व वा बिदाको दिनमा भने पर्यटकहरूको बाक्लो उपस्थिती रहने अध्यक्ष रानाको भनाई रहेको छ ।
पार्कलाई थप आकर्षक बनाउनको लागि पार्कको वाल निर्माण समेत काम सुरुवात गरिएको र अगामी दिनमा जीप लाईन सञ्चालन गरिने समेत योजना रहेको अध्यक्ष रानाको भनाइ छ । उनी भन्छन्–‘हामी आगामी दिनमा वाल पुरा गरेपछि जीपलाईन लगायतका अर्को थप ८ हेक्टर क्षेत्रफलमा पिकनिक सेड निर्माण गरी काम अगाडि बढाउने योजना बनाएका छांै ।’

पार्कलाई देवदहकै नमुना पार्कको रूपमा विकास गर्ने गरी योजना बनाएर अगाडि बढेको अध्यक्ष रानाको भनाइ छ । पर्यापर्यटनका रूपमा काम भइरहेको यस वन क्षेत्रमा पर्यटकलाई लक्षित गरी बाल उद्यान निर्माण गरिएको जानकारी दिँदै उनले अगामी दिनमा थप आर्कषक बनाउनको लागि के कस्तो पूर्वाधार निर्माण गर्न सकिन्छ भन्ने विषयमा योजना बनाएर अगाडि बढ्ने समेत जानकारी दिए ।