खोज

बुटवल, २३ चैत । लुम्बिनी पीस म्याराथनको रुट अन्तराष्ट्रिय मान्यता पाएको छ । बुद्धजन्मस्थल लुम्बिनीमा हुने यो म्याराथनलाई खेलकुदको स्वतन्त्र मान्यता प्राप्त सदस्यहरूको गठबन्धन (एम्स) ले मान्यता दिएको हो । दोस्रो संस्करणको म्याराथनको आयोजना हुन लागेको बेला नेपाल ओलम्पिक कमिटिको सहयोगमा एम्सका प्रतिनिधिले लुम्बिनी पीस म्याराथनको रुटलाई मापन गरि सर्टिफिकेट दिएको हो ।

‘नेपालगंज, काठमाडौ र पोखरा म्याराथनसंगै अब एम्सबाट मान्यता पाएको यो चौथो ईभेन्ट बनेको छ ।’—प्रदेश खेलकुद परिषद लुम्बिनीका सदस्यसचिव जयप्रकाश भट्टराईले बताए । विश्व शान्तिको मुहान लुम्बिनीमा खेलसंग जोडेर पर्यटन प्रवद्र्धनको अभियानलाई अघि बढाउन आवश्यक रहेको उनले बताए । विश्वकै उत्कृष्ट ईभेन्टका रुपमा लुम्बिनी म्याराथन हुने उनले दाबी गरे । प्राविधिक टोलीहरु आएर करीब ३ दिनको काम सकेर रुट फाईनल भएको उनले बताए । लुम्बिनीको शान्ति दीपबाट शुरु भएर भैरहवासम्मको २१ किलोमिटर दुरी मापन भएको सदस्यसचिव जयप्रकाश भट्टराईले बुटवलटुडेसंग बताए । दुई वटा निमार्णधिन पुल अहिले म्याराथनलाई बाधक बनेको उनले दुखेसो गरे । ट्राफिक समन्वय गरेर यो वर्ष ब्यवस्थापन गरिने र पुल निमार्ण भएपछि भने यो उत्कृष्ट रुट बन्ने उनले बताए ।

बुद्ध जन्मस्थल लुम्बिनीमा नेपाल पर्यटन बोर्ड, नेपालस्थित जनबादी गणतन्त्र चीनको दुताबास, लुम्बिनी विकास कोष (एलडिटी), र प्रदेश खेलकुद परिषद लुम्बिनीको आयोजना तथा नेपाल ओभरसिज चाईनिज एशोसियसन (एनओसिए), लुम्बिनी स्थित झोङ हुआ गुम्बा र लुम्बिनी होटल एशोसियसनसंगको सहआयोजना तथा लुम्बिनी बौद्ध विश्वविद्यालय, युनान पर्वतारोहण तथा आउट डोर स्पोर्ट एशोसियसन, लुम्बिनी प्रदेश पर्यटन विकास परिषद र ग्रिनरोडको सहकार्यमा २३ र २४ गते लुम्बिनी अन्तराष्ट्रिय शान्ति महोत्सव शुरु भएको हो ।

प्रतियोगिताको पुरुषतर्फ अन्तराष्ट्रिय मापदण्ड अनुसारको ४२ किलोमिटर बढीको म्याराथन दौड हुनेछ भने महिलातर्फ २१ किलोमिटर दुरिको हाफ म्याराथन दौड हुनेछ । पाच किलोमिटरको रोड रेस र विद्यालयका छात्रछात्राको लागि ३ किलोमिटर वाकाथन पनि हुनेछ । प्रतियोगिताको विद्यागत रुपमा २० लाख रुपैया खर्च हुने अनुमान छ ।