खोज

बुटवल, १५ चैत । रुपन्देहीमा जारी छैटो खड्ग प्रसाद गौचन मेमोरियल यु—१९ क्रिकेट प्रतियोगिता २०८० मा समुह बि अन्तरगत भएको खेलमा क्रिकेट एक्सलेन्स सेन्टर, काठमाण्डौ र धनगढी क्रिकेट क्लब विजयी भएका छन । बिहिबार भएको पहिलो खेलमा क्रिकेट एक्सलेन्स सेन्टर, काठमाण्डौले सेन्टर क्रिकेट एकेडेमी कास्कीलाई २ बिकेट तथा दोस्रो खेलमा धनगढी क्रिकेट क्लबले न्यु होराईजन क्लबलाई २१ रनले पराजित गरेको हो ।

एक्स्ट्रा टेक ओभल क्रिकेट मैदानमा भएको पहिलो खेलमा टस जितेर सिईसिले ब्याटिङको निम्तो दिएपछि कास्कीले ८ बिकेटको नोक्सानीमा ९६ रनको लक्ष्य खडा गरेको थियो । कास्कीका जोय गुरुङले २३, करण पंगेनीले १९, सरोज खत्रीले १५ तथा रुपेश थापाले १० रन बनाए । सिईसिका समिर विष्ट, समित बुढा र सन्नी शाहले समान २—२ बिकेट लिए । सिइसिले ८ बिकेटको नोक्सानीमा लक्ष्य भेटायो । उसका लागि बिरेन्द्रले १९, हेमराज सापकोटाले १६ तथा समिर बिष्टले १६ रन जोडे । खेलमा सिईसिका समिर बिष्ट म्यान अफ दी म्याचबाट पुरस्कृत भए ।

बिहिबार नै भएको दोस्रो खेलमा टस जितेर धनगढीले ब्याटिङ रोजेर ७३ रनमा सबै बिकेट गुमायो । उसका लागि अशोक धामीले ११ रनबाहेक अन्य ब्याट्सम्यान क्रिजमा टिक्न सकेनन । न्यु होराईजनका सुरज खड्काले ४, सन्तोष यादव, निर्मल गुरुङ र बिपर्सन केसीले समान २—२ लिए । झिनो लक्ष्य पछ्याएको न्यु होराईजन ५२ रनको स्कोरमा समेटियो । उसका लागि अन्कित बिएमले २३ रनबाहेक अन्य ब्याट्सम्यानले दोहोरो अंक जोड्न सकेनन । धनगढीका सौर्य श्रेष्ठले ४, सचिन मल्ल र अशोक धामीले समान २—२ बिकेट लिए । खेलमा धनगढीका सौर्य श्रेष्ठ म्यान अफ दी म्याचबाट पुरस्कृत भए ।

प्रतियोगिताको लिग चरणका खेलहरु २५ ओभर तथा सेमीफाईनल र फाईनल खेल भने ४० ओभरको खेलिने उनले बताए । प्रतियोगिताको उपाधि विजता टिमले नगद ५० हजार रुपैया, कप, मेडल, प्रमाणपत्र तथा उपविजेता टिमलाई २५ हजार रुपैया, कप, मेडल, प्रमाणपत्रबाट पुरस्कृत गरिने छ । प्रतियोगिताको समूह ए मा स्टार क्रिकेट एकेडेमी, बोस्टन क्रिकेट क्लब, बिएमडब्लु बेष्ट्रन क्रिकेट एकेडेमी, मदन भण्डारी स्पोर्ट्स एकेडेमी तथा समूह बि मा पल्सर सिईसि काठमाडौ, डिष्ट्रिक एशोसियसन अफ कास्की, डिसिए धनगढी र न्यु होराईजन स्पोर्ट्स क्लब गरि आठ टिमले प्रतिस्पर्धा गर्ने छन । चैत २० गतेसम्म चल्ने प्रतियोगितामा करिब ६ लाख रुपैया खर्च हुने अनुमान रहेको छ ।