खोज

बुटवल, १० चैत । छैटो खड्ग प्रसाद गौचन मेमोरियल यु १९ क्रिकेट प्रतियोगिता २०८० शुरु भएको छ । शनिबार भएको उद्घाटन खेलमा बोस्टन क्रिकेट एकेडेमीले विजयी शुरुवात गरेको छ । बोस्टनले स्टार क्रिकेट एकेडेमीमाथि ३ बिकेटको जित निकालेको हो ।

एक्स्ट्रा टेक ओभल क्रिकेट मैदानमा भएको खेलमा टस जितेर बोस्टनले ब्याटिङको निम्तो दिएको थियो । स्टारले निर्धारित २५ ओभरमा ८ बिकेटको नोक्सानीमा १ सय ३ रनको लक्ष्य खडा गरेको थियो । निरज मौर्याले २७ बलमा २८, प्रदिप साहनीले १९ बलमा १० रन जोडेका थिए । बोस्टनका दिवस खड्काले ५ ओभरमा १९ रन खर्चेर ३ तथा दिब्यास बास्तोलाले ५ ओभरमा १२ रन खर्चेर ३ बिकेट लिएका थिए ।
कम स्कोरलाई बोस्टनले २३.५ ओभरमा ७ बिकेटका नोक्सानीमा भेटायो । बोस्टनका जितमा आशिष रानामगरले २८ बलमा नटआउट ४४ रन तथा अरबिन पौडेलले १९ बलमा १५ रनको योगदान दिए । स्टारका प्रिन्स पालले ५ ओभरमा १ मेडलसहित १७ रन खर्चेर २ बिकेट लिए । खेलमा बोस्टनका आशिष रानामगर म्यान अफ दी म्याचबाट पुरस्कृत भए ।

प्रतियोगिताको उद्घाटन गर्दै तिलोत्तमा नगरपालिकाका नगरप्रमुख रामकृष्ण खाडले ब्यवसायिक खेलाडी उत्पादनको आधार तयार भईरहेको बताए । सधै युवाहरु अवसरको खोजीमा रहने भन्दै विदेश जाने पछिल्लो अवस्थालाई सकारात्मक रुपमा लिनुपर्ने उनले बताए । युवा विदेश जाने प्रचलन पहिलेदेखी नै रहेको भन्दै उनिहरु विदेशमा सिकेको सीप, कमाईबाट आफ्नो देशको विकासमा उत्प्रेरण जगाउन जरुरी रहेको बताए । तिलोत्तमामा खेलमा संस्कारको विकास गर्ने शुरुवात भएको छ ।

कार्यक्रममा प्रदेश खेलकुद परिषद लुम्बिनीका सदस्यसचिव जयप्रकाश भट्टराई, लुम्बिनी प्रदेश क्रिकेट संघका अध्यक्ष सन्जय गुरुङ, अन्तराष्ट्रिय एम्पायर समीर खान, मदन भण्डारी स्पोर्ट्स एकेडेमीका सचिव डा शक्ति बस्नेत, न्यु होराजन बोर्डिङ स्कुलका प्रार्चाय लोकनाथ उपाध्याय, पुर्व खेलाडी दिपेश लाम्गादे, एकेडेमीका निर्देशक कविता गौचन, पूर्व क्रिकेटर तथा प्रशिक्षक शक्ति गौचनले क्रिकेट विकासमा तीन तहकै सरकारसंगै सरोकारवालहरुको एक भएर लाग्न जरुरी रहेको बताए ।