खोज

बुटवल, ८ चैत ।

छैठौ खड्ग प्रसाद गौचन ममोरियल यु–१९ क्रिकेट प्रतियोगिता २०८० चैत १० गतेबाट शुरु हुने भएको छ । स्टार क्रिकेट एकेडेमीको आयोजना तथा क्रिकेट एशोसिएशन अफ रुपन्देहीको सहकार्यमा हुने प्रतियोगिताको सबै तयारी पूरा भएको विहिबार पत्रकार सम्मेलन गरी एकेडेमीका संस्थापक शक्ति गौचनले बताए ।

रुपन्देहीका ६ सहित ४ वटा अन्य प्रदेशबाट टिमहरु रहेका छन् । तिलोत्तमा नगरको एस्क्ट्राटेक ओभेल क्रिकेट मैदानमा हुने प्रतियोगिताको लिग चरणका खेलहरु २५ ओभर तथा सेमीफाईनल र फाईनल खेल भने ४० ओभरको खेलिने उनले बताए । प्रतियोगिताको उपाधि विजता टिमले नगद ५० हजार रुपैयाँ, कप, मेडल, प्रमाणपत्र तथा उपविजेता टिमलाई २५ हजार रुपैयाँ, कप, मेडल, प्रमाणपत्रबाट पुरस्कृत गरिने छ ।

प्रतियोगिताको समूह ए मा स्टार क्रिकेट एकेडेमी, बोस्टन क्रिकेट क्लब, बिएमडब्लु बेष्ट्रन क्रिकेट एकेडेमी, मदन भण्डारी स्पोर्ट्स एकेडेमी तथा समूह बि मा पल्सर सिईसि काठमाडौ, डिष्ट्रिक एशोसिएशन अफ कास्की, डिसिए धनगढी र न्यू होराईजन स्पोर्ट्स क्लब गरी आठ टिमले प्रतिस्पर्धा गर्ने छन् । २० गतेसम्म चल्ने प्रतियोगितामा करिब ६ लाख रुपैयाँ खर्च हुने अनुमान रहेको छ ।

रुपन्देही क्रिकेट संघका अध्यक्ष हरि थापाले क्रिकेट खेल र खेलाडीको प्रोत्साहन हुने गरी आयोजना गरिएको प्रतियोगितामा संस्थागत रुपमा प्राविधिक सहयोग गर्ने बताए । कार्यक्रममा खेलकुद पत्रकार मंचका अध्यक्ष सुमन अधिकारी, नेपाल पत्रकार महासंघका सल्लाहकार माधव ढुंगाना, एक्स्ट्राटेक ओभेलका सचिव सुर्य कँुवर, एकेडेमीका निर्देशक कविता गौचनले प्रतियोगिता सफलताको शुभकामना दिए ।