खोज

बुटवल, ६ चैत। आठौँ महिला तथा पुरुष भलिबल च्याम्पियनसिप अन्तर्गत महिलातर्फको खेलमा रुपन्देहीको एभरेष्ट भलिबल क्लबले लगातार दुई खेलमा जित निकालेको छ । सोमबार भएको खेलमा विभागीय टोली त्रिभुवन आर्मी क्लबलाई एभरेष्टले पराजित गरेको हो । यसअघि पहिलो खेलमा एभरेष्टले कर्णाली प्रदेशलाई ३–० सेटले हराएको थियो । जितसंगै एभरेष्टले दुई खेलबाट ६ अंक जोडेको छ ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको पहिलो खेलमा एभरेष्टले त्रिभुवन आर्मी क्लबलाई ३–१ को सेटमा पराजित गयो । पहिलो सेट २४–२६ ले आमीले जित निकाल्दै अग्रता लिएको थियो । त्यसपछिको भने लगातार ३ सेट आफ्नो पक्षमा पार्दै एभरेष्ट विजयी भयो । एभरेष्टले आर्मीमाथि २५–१७, २५–१९ र २५–२२ को जित निकालेको हो ।

एभरेष्ट नेपालको राष्ट्रिय टिमको क्याप्टेन अरुणा शाहीसहित भारतिय टिमका ३ खेलाडीको साथ उपाधि दाबेदारीमा छ । भारतको राष्ट्रिय टिमका ३ जना खेलाडीहरु जिन्सी जोन्सन, सुर्या एस, केपि अनुश्रीसहित युवा खेलाडीहरु निसा चौधरी, आरती चौधरी, अनुषा चौधरी, मिना सुनार, प्रमिला जिसि, रिचा थापा, रितु पुन, रुचि थापा टिममा रहदा उपाधिमा दाबेदाबी रहेको प्रशिक्षक अर्जुन घिमिरेले बताए । ‘अनुभवि र युवा खेलाडी टिममा रहेका कारण उपाधिमा दाबेदारी रहेको छ ।’—उनले भने ।

यसैगरि टिम म्यानेजर हरिस ओली, सहायक प्रशिक्षक सुनिता गौतम, कपिल जिसि, फिजिसियन मुकेश कुवर रहेका छन । प्रतियोगितामा ३ वटा विभागिय टिमहरु, चन्द्रागिरि न्यु डाईमण्ड, एभरेष्ट भलिबल क्लब, कर्णाली प्रदेश र मधेस प्रदेश टिम प्रतिस्प्रर्धामा छन । नेपाल भलिबल संघको आयोजनामा भएको उक्त प्रतियोगिताका विजेता टोलीले रु पाँच लाख तथा उपविजेताले रु दुई लाख ५० हजार पाउनेछन् भने तेस्रो हुने टोलीले रु एक लाख २५ हजार प्राप्त गर्नेछ ।