खोज

बुटवल, २७ फागुन ।

रुपन्देहीको तिलोत्तमामा निजी लगानीमा देशकै पहिलो अन्तर्राष्ट्रिय क्रिकेट मैदान तयार भएको छ ।

गैरआवासीय नेपाली विनोद कुँवरले अष्ट्रेलियामा गरेको कमाइबाट तिलोत्तमा नगरपालिकामा एक्स्ट्राटेक ओभल क्रिकेट मैदान निर्माण गरेका हुन् । उनले पहिलो चरणको संरचना फागुन २८ गते उद्घाटन गरी खेल सञ्चालन गर्ने तयारी गरिरहेको बताएका छन् ।

गत जेठ ३० गते शिलान्याय गरिएको उक्त रंगशालामा लेजेण्ड्स क्रिकेट कप आयोजना गर्न लागेको निर्देशक कुँवरले जानकारी दिए ।

श्रीमती सदिक्षासहित अष्ट्रेलियामा बस्दै आएका कुँवरले तिलोत्तमा नगरपालिका वडा नं १७ मा ४० करोड रूपैयाँभन्दा बढी लगानीमा एक्स्ट्राटेक ओभल रंगशालाको निर्माण गरेका हुन् । रंगशाला खेल्न तयार भएपनि अझै भौतिक निर्माण बाँकी रहेको कुँवरले बताए ।

‘मैदानमा प्याराफिट र अन्य संरचना पूरा हुँदा ४० करोड खर्च हुने अनुमान छ, प्याराफिट बनाउने काम सुरू भइसकेको छ । यसका लागि करिब १८ करोड खर्च हुनेछ,’ उनले भने ।

अष्ट्रेलियामा सूचना प्रविधि सम्बन्धी व्यवसाय गर्ने कुँवरले निजी स्रोतबाट उक्त रंगशाला निर्माण गरेका हुन् । रंगशालाको स्थायित्वको लागि गुरूयोजना बनाइसकेको र निर्माण सम्पन्न भएपछि व्यावसायिक रूपमा अघि बढाएर नमुना योजना बनाउने उनले बताए ।

‘नेपालमा रंगशाला कम छन् तर क्रिकेटको क्रेज बढ्दैछ, त्यसमाथि मैले व्यवसायिक तरिकाले योजना बनाएको छु, त्यहीअनुसार लगानी गरेको हो, म मेरो योजनामा ढुक्क छु, यसलाई पूर्ण सञ्चालनमा ल्याउँछु, यो मेरो संकल्प हो,’ उनले भने ।

मैदान उद्घाटनको दिन ४ टोलीबीच लेजेण्ड्स कप क्रिकेट प्रतियोगिता हुने कार्यक्रम छ । प्रतियोगितामा नेपालको पहिलो अन्तर्राष्ट्रिय खेल खेलेको सन् १९९६ को टोली, सन् २०१४ को टी–२० विश्वकप खेलेको टोली, रूपन्देही लेजेण्ड्स र रेस्ट अफ नेपाल गरेर ४ टोलीले सहभागिता जनाउने उनले बताए ।

नेपाल क्रिकेट संघ (क्यान) का सचिव पारस खड्काले सन् २०१४ टोलीको कप्तानी गर्नेछन् । सन् १९९६ को कप्तानी एलबी क्षेत्रीले गर्दा रेस्ट अफ नेपालको टिमलाई कलाम अली तथा रुपन्देही लेजेण्ड्सलाई हरिबहादुर थापाले कप्तानी गर्नेछन् । नेपालका पूर्वक्रिकेट खेलाडी शक्ति गौचन एक्स्ट्राटेक ओभल क्रिकेट मैदानका ब्रान्ड एम्बासडर छन् ।

यो क्रिकेट रंगशाला होस्टल सहितको एकेडेमी र ट्रेनिङ सेन्टर हुनेछ । उक्त एकेडेमी र सेन्टरको जिम्मेवारी शक्ति गौचनलाई दिइएको छ । रंगशाला कम्पाउन्डमा एकेडेमीको चार तले भवन बन्नेछ, जसमा १०० जनालाई आवासीय प्रशिक्षण दिइने बताइएको छ ।

कुँवरका अनुसार यूएईमा लामो समय बसेर अबुधावीको शेख जायेद अन्तर्राष्ट्रिय क्रिकेट रंगशालामा क्युरेटरको जिम्मेवारी लिएका माधव पाठक एक्स्ट्राटेक ओभल क्रिकेट मैदानको क्युरेटरको भूमिकामा छन् । करिब २५ हजार दर्शक क्षमताको रंगशालासहित एकेडमी भवन बनाउने र राम्रा खेलाडी उत्पादन गर्ने कुँवरको लक्ष्य छ ।

रुपन्देही आफैंमा क्रिकेटका लागि चिनिएको जिल्ला हो। यहाँ धेरै राष्ट्रिय खेलाडी जन्मिएका छन् । राजु खड्का, शक्ति गौचन, बसन्त रेग्मी, सुशन भारी, कुशल मल्ल, अमृत भट्टराई, देव खनाल, ईन्दु वर्मा रुपन्देही जिल्लाकै उत्पादन हुन् । यो रंगशालाले रूपन्देहीबाट थप खेलाडी तयार हुने विश्वास क्रिकेटप्रेमीहरूले लिएका छन् ।