खोज

बुटवल, २१ फागुन ।

रुपन्देहीमा सम्पन्न कलेज स्तरीय फुटसलको उपाधि राममणि क्याम्पसले चुमेको छ । युथ फर एक्सनको आयोजना, जेसिआई तिलोत्तमाको सहआयोजना तथा ग्लोबल रिचको मुख्य प्रायोजनमा सोमबार भएको रुपन्देही कलेज फुटसल च्याम्पियनसीप २०८० को फाईनलमा अक्सफोर्ड माविलाई ४–२ गोल अन्तरले पराजित गर्दै राममणिले उपाधि चुमेको हो ।

उपाधिसंगै उसले नगद ५० हजार रुपैयाँ, कप, मेडल, प्रमाणपत्रबाट पुरस्कृत भएको छ । उपविजेता अक्सफोर्ड नगद २५ हजार रुपैयाँ, कप, मेडल, प्रमाणपत्रबाट चित्त बुझायो । प्रतियोगितामा राममणिका १६ गोल हानेका राममणिका अंकित रासकोटी घोषित सर्वाधिक गोलकर्ता, राममणिका अंशुल सिन्जाली उत्कृष्ट गोलकिपर, सर्वोत्कृष्ट खेलाडी अक्सफोर्डका सुजलमान घले घोषित हुँदै पुस्कृत भए ।

लुम्बिनी फुटसल एरिनामा भएको फाईनलमा राममणिको जितमा अंकित रासकोटी र निश्चल मगरले २–२ गोल गरे । अक्सफोर्डका ध्रुव क्षेत्री र सुजन घलेले गोल गरेका थिए ।

कार्यक्रममा अखिल नेपाल फुटबल संघ (एन्फा) का उपाध्यक्ष तथा नेपाल ओलम्पिक कमिटिका सदस्य दीर्घबहादुर केसी, रुपन्देही लनटेनिस संघका अध्यक्ष गोपाल ज्ञवाली, खेलकुद पत्रकार मंच रुपन्देहीका अध्यक्ष सुमन अधिकारी, जेसिआई तिलोत्तमाको अध्यक्ष महेश पौडेल, ग्लोबल रिच बुटवलका शान्ति क्षेत्रीले विजेता, उपविजेता टिम र उत्कृष्ट खेलाडीहरुलाई पुरस्कार वितरण गरेका छन् ।

कार्यक्रममा अखिल नेपाल फुटबल संघ (एन्फा) का उपाध्यक्ष तथा नेपाल ओलम्पिक कमिटिका सदस्य दीर्घबहादुर केसीले विद्यालय स्तरबाट खेलाडी उत्पादनका लागि सरकार र सरोकारवाला निकायहरु लाग्नुपर्ने बताए । खेलकुदप्रतिको दृष्टिकोण सकारात्मक बनाउँदै लग्न जरुरी रहेको भन्दै ससाना क्लब र प्रायोजकहरुबाट खेल क्षेत्र चलेको उनले दाबी गरे । कतिपय विद्यालयहरु खेलकुद गतिविधिका नाममा शुल्क उठाउने भएपनि यस्ता गतिविधि नगराउने भन्दै यसतर्फ सोच्नुपर्ने अवस्था आएको उनले बताए । विद्यार्थी नेताहरु अब यस्ता विद्यालयमा हुने अनियमितताको खोजी गर्न आग्रह गरे । फुटसल लोकप्रिय खेलका रुपमा युवाहरुमाझ परिचित हुँदै गएको र अन्तर्राष्ट्रिय प्रतिस्पर्धामा पुग्ने गरी सरोकारवाला निकायहरु लाग्नुपर्ने उनले बताए ।

कार्यक्रममा जेसिआई तिलोत्तमाको अध्यक्ष महेश पौडेलले मानिसलाई स्वस्थ रहन खेलकुदको महत्वबारे प्रकाश पारे । कार्यक्रममा ग्लोबल रिच बुटवलका सुवोध खनालले खेलमार्फत आत्मियता, सहकार्य बढाउन मद्दत मिल्ने भन्दै सामाजिक उत्तरदायित्व वहन गर्दै संस्थामार्फत सहयोग गरेको बताए ।

युवा खेलाडीहरुको प्रतिभा प्रस्फुटन गर्ने र सामाजिक कार्यमा समेत योगदान दिने गरी कार्यक्रम गरेको अध्यक्ष प्रयास आचार्यले बताए ।

फागुन २० गतेबाट संचालन भएको प्रतियोगितामा २५ टिमले भाग लिएका संयोजक सन्जोग शर्माले बताए । प्रतियोगिताबाट बचत रकम मृगौला बिरामी पुष्पा थापालाई सहयोग गर्ने उनले बताए ।