खोज

बुटवल, २ माघ । बुटवल उपमहानगरपालिकाले आफनो ६५ औं स्थापना दिवसको अवसरमा आयोजना गरेको प्रथम लोकनृत्य प्रतियोगिताको उपाधि एभरेष्ट माविले जितेको छ । एभरेष्टले लोक नृत्य प्रतियोगिताको उपाधिसँगै नगद १ लाख रूपैया, शिल्ड, प्रमाणपत्र प्राप्त गरेको छ । उपविजेता नवीन औद्योगिक माबि नगद ६० हजार रूपैयामा चित्त बुझायो । न्यू होराइजन मावि र अक्सफोर्ड मावि तृतीय हुँदै नगद २५ हजार रूपैयाँबाट पुरस्कृत भएको छ । स्थापना दिवसको अवसर पारेर बुटवल उपमहानगरपालिकाले आयोजना गरेको २ दिने प्रतियोगितामा ४४ वटा विद्यालयले भाग लिएका थिए ।

बुधबार प्रतियोगिताको समापनका अवसरमा निर्णायक संयोजक दुर्गा रायमाझीले प्रस्तुत भएका नृत्यहरूमध्येबाट उत्कृष्ट छनौट गरिएको बताए । प्रस्तुत गितमा विविध समुदाय र क्षेत्रका नृत्यहरूले नेपालकै विविधता झल्काएको उनले बताए । प्रतियोगितामा उत्कृष्ट हुने विद्यालयहरूलाई बिहीबार बुटवल उपमहानगरपालिकाको ६५ औं स्थापना दिवसका अवसरमा पुरस्कार प्रदान गरिने लोकनृत्य प्रतियोगिताका संयोजक तथा वडा नं. १३ का अध्यक्ष नारायण पुनले बताए ।

कार्यक्रममा नगर प्रमुख खेलराज पाण्डेयले बुटवललाई सबै क्षेत्रमा अब्बल नगर बनाउनका लागि क्षमता विकास तथा क्षमता प्रदर्शन कार्यक्रमहरू आयोजना गरिएको बताए । उनले बुटवलमा खेल क्षेत्रलाई अगाडि बढाउनका लागि विद्यालयस्तरीय फुटबल प्रतियोगिता सम्पन्न भइसकेको र आगामी दिनमा अन्य प्रतियोगिताहरू सञ्चालन गर्ने तयारी गरिरहेको बताए । उनले बुटवललाई लोकसंस्कृति संरक्षण तथा प्रवद्र्धनमा अग्रस्थानमा राख्नका लागि प्रतियोगिता आयोजना गरेको बताए । उनले लोकसंस्कृतिको जगेर्ना तथा विद्यालयस्तरबाटै क्षमता विकासको कार्यक्रमअन्तर्गत लोकनृत्य प्रतियोगिता आयोजना गरेको बताए ।