खोज

बुटवल, २६ माघ । भलिबल खेलको पर्यायवाची बनेको छ, मणिमुकुन्द भलिबल क्लब । रूपन्देहीमा भलिबल खेल भन्ने बित्तिकै यो क्लबको नाम आउने गर्दछ । क्लबको ईतिहास र वर्तमानमा भलिबल छ । विशेषत पुरुष भलिबल विकासमा यो क्लबको योगदान रहेको छ । लुकेर रहेका युवा प्रतिभालाई खोजेर भलिबलमा निखार ल्याउने काम क्लबले गर्दै आएको छ । यस क्षेत्रमा युवा खेलाडीहरू उत्पादन गर्ने, नियमित अभ्यासमा जोड्ने, ब्यवसायिक बनाउने र उनीहरूलाई अवसर दिन प्रतियोगिता आयोजना गर्नेसम्ममा क्लब लागेको छ ।

तिलोत्तमाको सामुदायिक वन क्षेत्रमा खेल पूर्वाधारको प्रक्रियामा लागेको यो क्लब अहिले पहिलोपटक राष्ट्रिय भलिबल प्रतियोगिता आयोजनाको चटारो सकेको छ । बिहीबारबाट शुरु हुने प्रतियोगिताको विभागिय टिमहरू शसस्त्र प्रहरी बल, त्रिभुवन आर्मी क्लब र नेपाल पुलिस क्लब लगायतका टिमहरू रूपन्देही आईसकेका छन । ९ औ मणिमुुकुन्द कप राष्ट्रिय पुरुष भलिबल प्रतियोगिता २०८० को प्रदेश खेलकुद परिषद लुम्बिनी प्रवर्द्धन र मुख्य प्रायोजन, नेपाल भलिबल संघ संयोजन, तिलोत्तमा नगरपालिका र सहारा ईन्जिनियरिङ प्रालिको विशेष सहयोगमा मणिमुकुन्द भलिबल क्लबले गर्न लागेको हो ।

अन्तर जिल्ला र क्षेत्रिय गरि आठ वटा प्रतियोगिता भब्यताको साथ सम्पन्न गरेको क्लब पहिलोपटक राष्ट्रिय भलिबल प्रतियोगिता आयोजना गर्न लाग्दा धेरै महेनत गर्नु परेको मणिमुकुन्द भलिबल क्लबका अध्यक्ष लोकेन्द्र बहादुर भण्डारी बताउँछन । जिल्ला खेल खेलाएको अनुभवकै आधारमा आँट गरेर लागेको उनले बताए । ‘श्रोत जुटाउनेदेखी मैदानको तयारीसम्मको काममा खटिरहेका छौं ।’– थकित मुद्रामा उनले भने । प्रतियोगिताको स्वीकृति लिन प्रदेश खेलकुद परिषद लुम्बिनीबाट सहयोग मिलेको उनले बताए । यसैगरि प्रायोजनका लागि स्थानीय पालिकाहरू, संघसंस्थाहरूबाट सहयोग हुँदा प्रतियोगिता आयोजना गर्न आफूहरू ढुक्क भएको बताए ।

प्रतियोगिता प्रदेशकै गौरबका रूपमा रहेको प्रदेश खेलकुद परिषद लुम्बिनीका सदस्य सचिव जयप्रकाश भट्टराई बताउँछन । आयोजनाको स्वीकृति लिनेदेखी प्रमुख प्रवद्र्धन र प्रायोजकका रूपमा सहयोग गरेको उनले बताए । प्रदेश आफ्नै कार्यक्रमका रूपमा लिएर आवश्यक सहयोगमा लागेको उनले बताए ।

क्लबका संरक्षक तथा प्रतियोगिताका संयोजक सुरेन्द्र गुरुङले दिनरात खटिएर तयारी अन्तिम चरणमा पुगेको बताउँछन । ‘पुस १८ गतेबाट शुरु भएको तयारी अब अन्तिम चरणमा पुगेको छ ।’–उनले भने । क्लबकै खेलमैदानलाई दैनिक ५० जना युवाहरू लागेर ब्यवस्थित गर्न लागेको उनी बताउछन । ‘हामीले ३ हजार दर्शक अट्ने प्याराफिट तयार गरेका छौ ।’–उनले भने । दर्शकको सुविधा र खेलाडीको सहजतालाई पहिलो प्राथमिकतामा राखेको उनले बताए । म्याटलाई सेट गर्ने काम भएको उनले बताए । मोफसलमा स्थानिय क्लबको पहलमा पहिलो पटक हुन लागेको हुँदा पनि धेरै चुनौती रहेको छ । स्थानिय, जिल्ला खेलाएको अनुभवकै आधारमा राष्ट्रिय गर्ने तयारी निक्कै कठिनाई भएको उनको अनुभव छ । खेल मैदानको ब्यवस्थापन देखि खेलाडीको गुनासो नआउने गरि काम गर्न आफूहरू खटिएको उनले बताए । बिहीबार टाईसिट निकाल्ने तयारी छ । प्रतियोगितामा सहभागी हुने प्रत्येक टिमबाट १२ जना खेलाडी र ३ जना अफिसियलसहित १५ जनालाई खाना र बस्नको ब्यवस्थापन आयोजककै हो । नेपाल भलिबल संघबाट तोकिएको रेफ्रि/अफिसियनहरूबाट खेलाईन्छ । प्रत्यक्ष प्रसारण नमस्ते सुर्खेत अनलाईन पोर्टलबाट हुने सम्झौता भएको छ ।

लिग कम नकआउटका आधारमा खेलाईने खेलमा २४ वटा म्याच हुने उनले बताए । प्रतियोगितामा भाग लिने २ सय जना खेलाडीलाई १ लाख रूपैया बराबरको ईन्सुरेन्स समेत गरिएको उनले बताए । प्रतियोगितामा कोशी, मधेश, बागमती, गण्डकी, लुम्बिनी, कर्णाली, सुदुर पश्चिम प्रदेश भलिबल संघसहित त्रिभुवन आर्मि क्लब, नेपाल पुलिस क्लब र एपिएफ क्लब गरि १० टिमले भाग लिने छन् ।