खोज

दाङ,११ माघ। राष्ट्रियसभा सदस्यको लागि निर्वाचनको मतदान अन्तर्गत बिहान ११ बजेसम्म प्रदेशसभातर्फ ५९ जना र स्थानीय तहतर्फ १३७ जनाले मतदान गरेका छन् । प्रदेशसभा तर्फ २३ महिला र ३६ पुरुष सांसदले मतदान गरेका हुन् भने स्थानीय तहतर्फ ५१ महिला र ८६ पुरुषले मतदान गरेका हुन् । लुम्बिनी प्रदेशका मुख्य मन्त्री डिल्लीबहादुर चौधरीले पहिलो मतदान गरि मतदान सरुवात भएको हो । प्रदेश तर्फबाट मुख्यमन्त्री चौधरी र स्थानीय तहबाट घोराहीका नगरप्रमुख नरुलाल चौधरीले मतदान गरेका थिए । दाङको घोराही उपमहानगरपालिका १५ मा रहेको कर्मचारी मिलन केन्द्रमा दुई वटा मतदान केन्द्र रहेका छन् ।
निर्वाचन अधिकृत कुलप्रसाद पाण्डे अनुसार ‘क’ मतदान केन्द्रमा ८७ जना प्रदेशसभा सदस्यले मतदान गर्ने ब्यबस्था मिलाइएको छ भने ‘ख’ मतदान केन्द्रमा गाउँपालिकाका अध्यक्ष, उपाध्यक्ष र नगरपालिकाका प्रमुख उपप्रमुख गरेर दुई सय १८ जनाले मतदान गर्ने व्यवस्था मिलाइएको छ ।
मतदान केन्द्रमा आज बिहान ९ बजेदेखि अपराह्न ३ बजेसम्म मतदान हुने छ । लुम्बिनी प्रदेशमा अन्य र महिला क्लस्टरका दुई सिटका लागि ६ जना उम्मेदवार छन् ।
सत्ता गठबन्धनका तर्फबाट नेपाली कांग्रेसले महिला क्लस्टरमा गुल्मीका विष्णुकुमारी सापकोटा र नेकपा माओवादी केन्द्रले अन्यतर्फ रोल्पाका झक्कुप्रसाद सुवेदीलाई उम्मेदवार बनाएको छ । यस्तै नेकपा एमालेले अन्य क्लस्टरतर्फ पाल्पाका झपेन्द्र बहादुर घर्ती क्षेत्री, महिलातर्फ दाङका तुलसा कुमारी केसीलाई उम्मेदवार बनाएको छ ।
राप्रपाले महिला क्लस्टरमा कपिलवस्तुकी विजया लक्ष्मी सिंहलाई उम्मेदवार बनाएको छ । जनमत पार्टीको तर्फबाट अन्य क्लस्टरमा नवलपरासीका बाल गोविन्द चौधरी उम्मेदवार छन् । लुम्बिनी प्रदेशमा १०९ स्थानीय तहका प्रमुख र उपप्रमुख गरी २१८ जना र प्रदेशसभाका ८७ जना सांसद मतदाता छन् ।
प्रदेश सभाका सदस्यको प्रति मतदाता मतभार ५३ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको प्रति मतदाता मतभार १९ रहेको छ । मतदानको काम सकिय लगत्तै मतगणना गर्ने र त्यसको तयारी गरेको प्रदेश निर्वाचन कार्यालय दाङले जनाएको छ ।