खोज

बुटवल, ३० असोज।  बुटवलमा जारी स्व गंगा कुमारी मल्ल स्मृति कप २०८० खुला नकआउट सेभेन ए साईडको उपाधि आयोजक आर्दश युवा क्लबले चुमेको छ । मंगलबार भएको फाईनल खेलमा ह्वाईट लोटस एफसी, सालघारीलाई २–० गोल अन्तरले पराजित गर्दै आयोजक आर्दशले उपाधि चुमेको हो । उपाधिसंगै आर्दशले नगद ५० हजार रुपैया, कप, मेडल, प्रमाणपत्रबाट पुरस्कृत भयो । उपविजेता ह्वाइट लोटस नगद २३ हजार रुपैया, कप, मेडल, प्रमाणपत्र तथा तृतिय टिमले नगद १० हजार रुपैया, कप, मेडल, प्रमाणपत्रमा चित्त बुझायो । प्रतियोगितामा आर्दशका सुमित मल्ल सर्वोत्कृष्ट खेलाडी, अनन्त शेख उत्कृष्ट गोलकिपर, ह्वाइट लोटसका प्रवेश गुरुङ सर्वाधिक गोलकर्ताबाट पुरस्कृत भए ।

स्व गंगा कुमारी मल्लको स्मृतिमा नाति डिजन मल्ल एवं प्रविण मल्ल मुख्य प्रायोजन, बुटवल उपमहानगरपालिका वडा नं १५ दुर्गा माता भवानी मन्दिर संस्थाको संरक्षकत्व तथा स्व दिलिप पुन (नारायण) स्मृतिमा विष्णु थापा सहप्रायोजन, आदर्श युवा क्लबको आयोजनामा उजेलापुरस्थित खेलमैदानमा भएको खेलको पहिलो हाफ बराबरी भयो । दोस्रो हाफमा भने उत्कृष्ट खेल प्रदर्शन गर्दै आयोजक आर्दशका हिमाल थापाले गोल गरे । यसैगरि आयुष गुरुङले दोस्रो गोल गर्दै जित सुनिश्चित गरे । खेलमा आर्दशका निर बहादुर थापा म्यान अफ दी म्याचबाट पुरस्कृत भए ।

एक समारोहका बिच बुटवल उपमहानगरपालिकाका प्रवक्ता तथा वडा नं १५ का वडाअध्यक्ष शिव राना, निवर्तमान जनप्रतिनिधि डम्बर बहादुर भण्डारी, प्रथम पुरस्कार प्रायोजक भरत बम मल्ल, रुपन्देही जिल्ला फुटबल संघका अध्यक्ष लोक पुन, सेमलार खानेपानी तथा सरसफाई उपभोक्ता समुहका अध्यक्ष प्रेम प्रसाद पौडेल, समाजसेवी शेषनारायण नेपाल,क्लबका पुर्वअध्यक्ष सन्तोषमान सिमागैडा, दोस्रो पुरस्कार प्रायोजक भिम थापा, दुर्गा भवानी विद्यालयका अध्यक्ष कृष्ण प्रसाद भुषाल, समाजसेवी भरत बम मल्ल, क्लबका अध्यक्ष मनिष काफ्ले, उपाध्यक्ष सुजन ठकुरीले विजेता, उपविजेता टिम तथा उत्कृष्ट खेलाडीहरुलाई पुरस्कृत गरे ।

बुटवल उपमहानगरपालिकाका प्रवक्ता तथा वडा नं १५ का वडाअध्यक्ष शिव रानाले खेल विकासमा युवाहरुको योगदान र अगुवाई हुनुपर्ने बताए। लामोसमयपछि आयोजना गरिएको प्रतियोगितालाई निरन्तरता दिने गरि योजना अघि बढ्न सुझाव दिदै पुर्वाधार विकास र खेलाडी उत्पादनमा समेत जोड दिनुपर्ने बताए । प्रतियोगितामा रुपन्देहीसहित दाङ, पाल्पा जिल्लाका गरि २४ टिमले प्रतिस्पर्धा गरेको क्लबका सचिव साजन खातीले बताए ।