खोज

बुटवल, १९ असोज ।

पछिल्लो समय नेपालबाट विदेश पलायन हुने युवाहरुको सङ्ख्या निकै बढेको छ । यसै विषयलाई मध्यनजर गरी युवा शक्ति स्वदेशमै परिचालन गर्न र युवाहरुलाई उद्यममा जोड्ने उद्देश्यले लुम्बिनी प्रदेश सरकारले युवा लक्षित युवा स्वरोजगार कार्यक्रम ल्याएको छ ।

मुख्यमन्त्री आर्थिक विकास कार्यक्रमको सर्वेक्षण तथा छलफलको आयोजना लुम्बिनी प्रदेश सरकार सामाजिक विकास मन्त्रालय र प्रदेश युवा परिषदद्वारा बुटवलमा आयोजित मुख्यमन्त्री आर्थिक विकास कार्यक्रमको सर्वेक्षण कार्यक्रममा उद्यममा युवाहरुको अवसर चुनौती र सरकारको आवश्यक समन्वय विषयमा उद्यमशील युवा र सरोकारवालहरुसँँको छलफलमा सहभागी युवाहरुले सरकारप्रति युवाहरुको कुण्ठैकुण्ठा भएको गुनासो गरे । युवा संरक्षण र परिचलनको लागि सरकारले कुनै पनि पहल नगरेको कार्यक्रममा सहभागी युवा उद्यमीहरुको आरोप छ ।

कृषिकै क्षेत्रमा पनि अनुदानको नाममा हुँदा खाने भन्दा पनि हुने खानेहरुको लागि मात्रै अनुदान पाउँछन्, जो दिनरात खेतमै समय बिताउँछन्, असल कृषकहरु राज्यमा पहुँच नभएको कारण अनुदान पाउँदैन, त्यसकारण पहुँचको आधारका वितरण हुने अनुदानले झनै भष्ट्राचार भएको बताउँदै सरकारले दिने अनुदान बन्द गर्नुपर्ने युवाहरुले बताए । सरकारले किसानको उत्पादन र उत्पादित वस्तुको उचित मूल्य र बजारीकरण गर्ने व्यवस्था मिलाउनु पर्ने उनीहरुको भनाई छ । युवाको सिप र क्षमतालाई सरकारले पहिचान गर्न नसकेको कारण विदेशीने युवाहरुको सङ्ख्या बढेको कार्यक्रममा सहभागी पाल्पाका युवा उद्यमी विज्ञान घिमिरेले बताए ।

पछिल्लो समय विश्व जगतमा नयाँ नयाँ प्रविधि भित्रिएसँगै नेपालका युवाहरुले पनि उक्त प्रविधि प्रयोग गरिरहेका छन् र किसानले उत्पादन गरेका हरेक वस्तु डिजिटल मार्केटिङ अर्थात अनलाइन एप मार्फत प्रचार र बिक्री पनि गरिरहेका छन् यसमा प्रदेश सरकारले समन्वय गरी आवश्यक सहयोगको अपेक्षा रहेको उनीहरु बताउँछन ।

कार्यक्रममा योजना आयोग लुम्बिनी प्रदेश उपाध्यक्ष डा. नहकुल केसीले प्रदेश सरकारले ल्याएको मुख्यमन्त्री आर्थिक विकास कार्यक्रमको छलफलमा युवा लक्षित नयाँ कार्यक्रमहरु सरकारले ल्याएको बताए । उनले भने, “तर अब युवा र सरकारको पारस्परिक सम्बन्ध हुन आवश्यक छ ।” उनले युवालाई बिदेश पलायन हुनबाट रोक्न र युवा शक्तिलाई स्वदेशमै परिचालन र संरक्षण गर्न युवाहरुको सल्लाह अनुसार अझै थप कार्यक्रम अगाडि सार्ने समेत बताए ।

युवा परिषद् लुम्बिनी प्रदेशका उपाध्यक्ष गोविन्द बहादुर खत्रीले कार्यक्रमबारे प्रकाश पार्दै युवाहरुलाई टिकाउने र उनीहरुको सीपलाई बिकाउने खालका कार्यक्रमहरु ल्याउन जरुरी रहेको बताउँदै युवा श्रमको सम्मान गर्नुपर्ने बताए । पर्यटन विकास परिषद्का निर्देशक रामु जोसीले छलफलका क्रममा उठेका प्रश्नहरुको प्रतिउत्तर दिँदै देश समृद्ध हुनको लागि युवाहरु मुख्य भूमिका रहेको बताउँदै युवा उद्यमशिल भएर आर्थिक रुपमा बलियो भए मात्रै देशको अर्थतन्त्र बलियो हुने र समृद्ध राष्ट्रको परिकल्पना साकार हुने बताए । उद्यमको क्षेत्रमा तीनै तहको सरकारले युवसँग प्रत्यक्ष जोडिएर काम गर्ने र राज्यमा पहुँच हुनेगरी समन्वय गर्ने निर्देशक जोसीले बताए ।

त्यस्तै मानव अधिकार तथा शान्ति समाजका निवर्तमान केन्द्रीय सभापति गोविन्द खानलले सरकाले युवाहरुको सीप पहिचान हने गरी डाटा संकलन गरी क्षमताको आधारमा श्रमको सम्मान गरी उचित पारिश्रमिक दिने निति ल्याउन जरुरी रहेको बताए । त्यस्तै तालिम तथा युवा रोजगार व्यवसाय महासंघका अध्यक्ष ठाकुर घिमिरे युवाहरुलाई उद्यमका तालिम पश्चात पनि आवश्यक साधन र स्रोत जुटाउन सरकारले सहयोग गर्नुपर्ने बताए । उक्त कार्यक्रममा बिभिन्न उद्यमहरुबाट प्रतिनिधित्व गर्दै ३० जना बढि उद्यमीहरुको उपस्थित रहेको थियो ।