खोज

भैरहवा, १८ असोज । बौद्ध मार्गीका ४ वटा पवित्र तिर्थ स्थल मध्ये भगवान गौतमबुद्धले पहिलो पटक पाइला टेकेको स्थान लुम्बिनीबाट थाइल्याण्डका डाक्टरहरूले ३२ जना बिरामीको घुँडाको शल्यक्रिया गरेका छन् ।
रूपन्देही जिल्लाको सिद्धार्थनगर सिटी हस्पिटलमा थाइल्याण्डको श्रीराज हस्पिटलका हाडजोर्नी तथा नशा रोग विशेषज्ञ प्राध्यापक डाक्टर किराती सी वानिच नेतृत्वको टोलीले बिरामीको घुँडा तथा हिपको प्रत्यारोपण गरेका हुन् । प्रत्यारोपणमा पाल्पा, काठमाडांै, रूपन्देही, कपिलवस्तु, नवपरासी लगायत जिल्लाका बिरामीहरू लाभान्वित भएका छन् ।

आइतबारदेखि मंगलबार तीनदिन सम्म भएको निःशुल्क शल्यक्रिया शिविर सर्जरी क्याम्पसमा सिद्धार्थनगर सिटी हस्पिटलका हाडजोर्र्नी तथा नशा रोग विभाग प्रमुख डाक्टर जावेद अहमद खानको नेतृत्वमा अस्पतालमा कार्यरत डाक्टर, नर्स र अन्य सहयोगी कर्मचारीहरू सहभागी भएको सिटी हस्पिटलका प्रबन्ध निर्देशक अर्जुन पौडेलले जानकारी दिए ।

सिद्धार्थनगर सिटी हस्पिटल प्रालिका प्रबन्ध निर्देशक अर्जुन पौडेलले गत २८ जुलाई २०२३ मा लुम्बिनीस्थित पीस हार्मोनी सेन्टरमा निःशुल्क स्वास्थ्य शिविर सञ्चालन गरिएको बताए । यो नेपालकै राजधानीमा गर्नुपर्ने कार्यक्रम हो सायद यो स्तरका कार्यक्रम मोफसलमा भएका थिएनन् । पौडेलले भने, राम्रो र सबै सुबिधा भएको अस्पताल भएका कारण र लुम्बिनीमा गौतमबुद्धले पहिलो पाइला टेकेको स्थानबाटै शान्तिको सन्देश दिने उद्देश्यले उनीहरूको लामो अध्ययन तथा भिजिटपछि सिटी हस्पिटल उनीहरूको रोजाइमा पर्यो ।

८ सय जना बिरामीको स्वास्थ्य परीक्षण गरिएको उक्त शिविरमा औषधी समेत निःशुल्क वितरण गरिएको थियो पौडेलले भने शिविरबाट छनौट भएका ३२ जना बिरामीको निःशुल्क शल्यक्रिया भएको हो । निःशुल्क शल्यक्रिया शिविरले यस क्षेत्रमा बसोबास गर्ने गरीब तथा विपन्न परिवार लाभान्वित भएको पौडेलको तर्क छ । शल्यक्रिया शिविरका लागि थाइल्याण्डबाट १२ जना विशेषज्ञ डाक्टर, फिजियोथेरापिष्ट, नर्सिङ कर्मचारीसहित २५ जनाको मेडिकल टीम र अन्य सहयोगी संस्थाका प्रतिनिधि गरी ७६ जना आएको पौडेलले जानकारी दिए ।
राजकीय थाई विहार लुम्बिनीको पहलमा, थाइल्याण्डस्थित श्रीराज हस्पिटल र थाइल्याण्डमा रहेका सहयोगी संस्थाहरूको सहयोगमा सिद्धार्थनगर सिटी अस्पतालमा शल्यक्रिया शिविर भएको हो ।

लुम्बिनी विकास कोषका उपाध्यक्ष डाक्टर ल्हारक्याल लामाले लुम्बिनीबाट शान्तिको सन्देश फैलाउन पाउँदा नेपाली भाग्यमानी भएको बताए । लुम्बिनी विश्वकै पवित्र ठाउँ हो यस पबित्र ठाउँबाट सबैलाई शान्तिको सन्देश दिनुपर्छ लामाले भने । बुद्ध दर्शन नै शान्तिको सन्देश भएको बताउँदै उपाध्यक्ष लामाले बुद्ध लुम्बिनी, कपिलवस्तुर नवलपरासीको मात्रै नभएर, ३ करोड नेपालीको भएको बताउँदै ३ करोड नेपालीले यो सन्देश विश्व सामु पु¥याउनुपर्ने बताए ।

रूपन्देहीका प्रमुख जिल्ला अधिकारी गणेश अर्यालले सरकारले गर्ने काम निजी क्षेत्रले गरेकोमा बधाई ज्ञापन गरे । उनले भने, कुनै हिसाबले यहाँहरूले सरकारलाई सहयोग गर्नुभएको छ । सरकारले गर्नुपर्ने काम यहाँहरूबाट सम्पन्न गर्नुभयो यति महत्वपूर्ण कामको संयोजन गर्ने राजकीय थाई विहार लुम्बिनीलाई धन्यवाद दिन चाहन्छु ।

सिद्धार्थनगर सिटी हस्पिटल प्रालिका अध्यक्ष डाक्टर सुवोध कुमार पाण्डेयले सबैले राम्रो सुविधा पाउन भन्नेतर्फ अस्पताल लागिपरेको बताए । उनले शल्यक्रियाले बिरामी आफै हिंड्न सक्ने भएको बताए । सिद्धार्थनगर सिटी हस्पिटलका बिजनेश म्यानेजर पंकज पाण्डेले यो नेपाल र नेपालीका लागि अत्यन्तै राम्रो काम भएको बताए । कार्यक्रममा थाइल्याण्डका भन्ते गुरुहरू, अस्पतालका डाक्टरहरू, नर्सहरूको आतिथ्यता रहेको थियो ।