खोज

चन्द्रौटा (कपिलवस्तु), ७ असोज । बंगुरपालन किसानको समस्यालाई मध्यनजर गर्दै शिवराजले बंगुरको नश्ल सुधार कार्यक्रम गरिरहेको छ । यसबाट स्थानीय किसानले मात्रै होइन अरूले समेत फाइदा लिइरहेका छन् । “बंगुर पालक किसानको उत्पादन वृद्धि तथा प्रजनन्का लागि उन्नत पाठापाठी नगरपालिकाको सहयोगले कृषकले आफ्नै फर्ममा प्रजनन् गराउन सहज भएको छ । स्थानीय स्तरका पाठापाठी खरिद गर्दा प्रजाति थाहा नहुँदा वृद्धि विकास कम हुने गर्दथ्यो । पालिकाले गरेको सहयोगले अब आगामी समयमा प्रभावकारी हुन्छ”ः कपिलवस्तुको शिवराज वडा नम्बर–३, भितरियाका सूर्य थारुले भने ।

यस्तै सोही वडा मदवाका कृषक लाल वहादुर घर्ती सरकारी प्रजनन केन्द्रबाट खरिद भएकोले गुणस्तरमा सुनिश्चितता भएको बताउँछन् । उत्पादन भएका बंगुर बिक्री गर्न सहज भएपछि कपिलवस्तुमा बंगुर पालन गर्नेको लहर चल्न थालेको हो । पछिल्लो समय गाउँटोलमा साप्ताहिक कृषि हाटबजार खुल्न थालेपछि मासु बिक्री सहज बनेको छ । जसले गर्दा व्यापारीहरू बंगुर खरिद गर्न कृषकको घर मै आउने गरेको विगत एक दशक देखि बंगुर पालन गर्दै आएका स्थानिय कृषक रमेश थारु बताउँछन् ।

शिवराज नगरपालिकाले बंगुरको नश्ल सुधार गर्ने कार्यक्रम सञ्चालन गरेको छ । नगरका बंगुर पालक कृषकको उत्पादन वृद्धि गर्न उन्नत जातको पाठापाठी वितरण गरेको छ । गत आर्थिक वर्षमा ५० प्रतिशत अनुदानमा २२ जना कृषकलाई पाठापाठी वितरण गरेको पशु शाखाले जनाएको छ । केही कृषकहरूले अनुदानमा खरिद भएका बंगुर ढिलो हुर्किएको गुनासो समेत गरेका छन् । उन्नत जात पालन गर्दा आहारा, सरसफाई जस्ता पक्षमा ध्यान नदिँदा समस्या हुन सक्ने नगपालिकाले जनाएको छ । कृषकको फर्ममा अनुगमन गरी समस्या समाधान गरिने शाखा प्रमुख धनेश्वर खनालले बताए ।

राष्ट्रिय पशु प्रजनन् कार्यालय पोखराबाट ल्याण्डरेस, योर्कशायर, ड्युुरोक जातका बंगुरका पाठा पाठी प्रजनन बिउका लागि उपलब्ध गराएको प्रमुख खनालले बताए । उनका अनुसार प्रति जिउ ५ हजारको दरले पाठापाठी खरिद गरिएको छ । कृषकका मागका आधारमा उत्कृष्ट किसान छनोट गरी वितरण गरिएको थियो । पालिकाले कृषकलाई स्याहार सुसार गर्न तालिम प्रदान गरेको छ ।

प्रजनन् बिउका पाठापाठीलाई रोग लागेमा उपचार गर्न प्राविधिक समेत खटाइएको नगरपालिकाले जनाएको छ । कृषकहरूलाई सरकारले अनुदान लगायतका सुविधा उपलब्ध गराए पनि बैंकको चर्को ब्याज त्यसमा मासु तथा दानाको मूल्य उतारचढाबले गर्दा कृषक मारमा परेको गुनासो गर्ने गरेका छन् । à