खोज

गुल्मी, ६ असोज । गुल्मीमा सम्बन्ध विच्छेदका मुद्दाहरूको संख्या दिनानुदिन बढ्दै गएको देखिएको छ । गुल्मी अदालतले सार्वजनिक गरेको तथ्यांक अनुसार चालु आर्थिक वर्षमा सबैभन्दा बढी तीन सय ८२ थान मुद्दा सम्बन्ध बिच्छेदका मात्र दर्ता भएका छन ।
आर्थिक वर्ष २०७९/८० मा अदालतमा दर्ता भएका तीन सय ८२ थान मुद्दाहरू मध्ये अहिलेसम्म तीन सय २८ थान मुद्दा फस्र्योट भैससकेका छन । जिल्ला न्यायाधीश बसन्तराज पौडेलले दिएको जानकारी अनुसार तीन सय ८२ थान मुद्दाहरू मध्ये ५४ थान मुद्दा अझै फस्र्योट हुन बाँकी रहेका छन । बाँकी रहेका मुद्दाहरू चाँडैनै फछ्र्योटको चरणमा रहेको न्यायाधीश पौडेलले बताए ।

गुल्मी जिल्लामा सम्बन्ध बिच्छेद मुद्दाहरू मध्ये तीन सय नौं थान महिलावादी र ७३ थान मुद्दा पुरुषवादी रहेका छन । आर्थिक वर्ष २०७९/८० असार मसान्तसम्मको तथ्यांक अनुसार महिलावादी भएको तीन सय नौं थान मुद्दामा दुई सय ७२ थान मुद्दा फछ्र्यौट भई बाँकी ३७ थान मुद्दा चालु अबस्थामा रहेको बताईएको छ ।

सानै उमेरमा युवा युवतीहरू बीच प्रेम सम्बन्ध हुनेर त्यही सम्बन्धका आधारमा हतारमै विहे गर्ने प्रचलनका कारण सम्बन्ध बिच्छेद गर्नेहरूको संख्या बढेको पाइएको छ । सम्बन्ध विच्छेद गर्नेहरूमा २० देखि ३० वर्ष उमेर समूहको संख्या बढी रहेको छ । साथी सँगतमा लागेर हतारमा बिहे गर्ने र फुर्सदमा पछुताउने भएका कारण पनि सामान्य भनाभन र स साना झगडाका कारण पनि जिल्लामा सम्बन्ध बिच्छेद गर्ने प्रचलन बढेको महिला अधिकारकर्मी विष्णु सापकोटा बताउँछिन ।

गुल्मी अदालतमा ७२ वर्ष उमेरसम्मका वृद्धले समेत सम्बन्ध बिच्छेद गरेका छन । गत आर्थिक वर्षमा गुल्मीदरबार गाउँपालिका ४ का ७२ वर्षीय तिल बहादुर बिश्वकर्मा र ६९ वर्षीया बाटुली बिश्वकर्माले गुल्मी जिल्ला अदालतवाट सम्बन्ध बिच्छेद गरेका थिए । गुल्मी अदालतले २०८० असार मसान्तसम्म जिल्लामा ८१ प्रतिशत मुद्दा फस्र्योट गरिसकेको जनाएको छ । गत असार मसान्तसम्म सात सय १२ थान मुद्दा रहेकोमा पाँच सय ७६ थान मुद्दा फस्र्योट भैसकेको विवरणमा उल्लेख गरिएको छ । पछिल्लो समयमा गुल्मी जिल्ला अदालत मुद्दा फस्र्योट गर्ने काममा अब्बल बनेको छ । अदालतले दिएको बिबरण अनुसार गुल्मी अदालतले लक्ष्य भन्दा एक सय चार थान मुद्दा फस्र्योट गरेको जनाएको छ ।

त्यसैगरि करणी सम्बन्धि दर्ता भएका ३५ थान मुद्दामा २७ थान मुद्दा फस्र्योट भैसकेको र सात थान मुद्दा फस्र्योट हुन बाँकि रहेको अदालतले जनाएको छ । विशेष प्रकृतिका निवेदन अन्र्तगत मृत्युको न्यायिक घोषणाका ८२ थान मुद्दा दर्ता भएकोमा ६३ थान फस्र्योट भैसकेका छन । पछिल्लो समयमा गुल्मी अदालतमा दर्ता भएका अन्य मुद्दाहरूको तुलनामा सम्बन्ध बिच्छेदका मुद्दाको संख्या दिनानुदिन बढ्दै गएको पाईएको छ ।