खोज

बुटवल, ३० भदौ ।

घर खरीद गरी एक व्यक्तिले स्थानीय एक वृद्ध दम्पत्तीसँग ६० लाख रुपियाँ ठगी गरेका छन् ।

रुपन्देहीको शुद्धोधन गाउँपालिका वडा नम्बर ४ निबासी मनरुपा रेग्मीको १५ धुरमा बनेको घर कपिलवस्तु ४ नम्बरका कुम्भस गिरीले २०७८ मंसिर १५ मा खरीद गरेका थिए । तर खरीद गर्दा विभिन्न मितिको ६३ लाखको चेक दिएपछि सोही चेकको विश्वासका आधारमा घरधनी मनरुपाले १५ धुरमा बनेको घर कुम्भज गिरीका नाममा रजिष्ट्रेशन पास गरिदिएकी थिइन् ।

बुटवल–१२ तामनगर निवासी माया सुवेदीले जग्गा खरीद गर्ने गिरीलाई घरधनी मनरुपाका ज्वाईं राजेश लम्सालसँग सम्पर्क गराएकी थिइन् । घरधनी मनरुपाले आफ्नै ज्वाईको विश्वासको आधारमा घर पास गरिदिएकी थिइन् । ज्याई लम्सालले भने माया सुवेदीको विश्वासको आधारमा घर पास गर्नका लागि आफ्ना ससुरालीलाई सहमत गराएका थिए ।

“म विदेश बसेर आएको मान्छे, जग्गाको कारोबार अहिलेसम्म गरेको छैन, आफ्नै ससुरालीको घर बिक्रीका लागि स्थानीय माया सुवेदीले घर खरीद गर्ने मान्छे ल्याएपछि म पनि विश्वासमा परेर खरीद बिक्रीको काम भएको हो”–शनिबार आयोजित पत्रकार सम्मेलनमा लम्सालले भने ।

घर खरीद गर्ने क्रममा बयनो बापत १० लाख रुपियाँको चेक २०७८ मंसिर १५ गतेको मितिमा खरीदकर्ताले काटेका थिए । तर सो चेक पनि नसाटिएको र त्यसबापतको ४ लाख रुपियाँ नगद ल्याएर दिएको घरधनी मनरुपाले बताइन् ।

त्यस्तै २०७८ माघ १५ गतेको मितिमा २५ लाख रुपियाँको चेक काटिएको छ भने २०७८ चैत ३० गतेको मितिमा २८ लाख रुपियाँको चेक काटिएको छ । ती सबै जोड्दा चेकबापतको रकम ६३ लाख हुन आउँछ । त्यसबाहेक एक लाख रुपियाँ छुट्टै नगद दिएकाले ६४ लाख रुपियाँ घरधनीले पाउने गरी खरीद बिक्री भएको पाइएको छ । तर घर खरीद बिक्री गर्दा ७० लाखमा कागज भएको देखिएको छ । बाँकी ६ लाख रुपियाँ कारोबार गरिदिने माया सुवेदीले कमिशन खाने मनसाय राखेको देखिएको छ ।

मनरुपाका श्रीमान रत्नखर रेग्मीले पैसा प्राप्त नहुँदासम्म आफूले घर पास नगरिदिन आग्रह गरेको तर ज्वाईंले भनेपछि पास गरिदिएको बताए । दुवै पक्षबीच मध्यस्थकर्ताको भूमिका खेलेकी माया सुवेदीले घर खरीद गरेर पैसा नतीर्दा आफू समेत तनावमा परेको बताइन् । “मैले नै कारोबार गराएकी हुँ, तर खरीद गर्ने कुम्भज गिरीले पैसा दिन्छु भनेर बारमबार झुक्याइरहेका छन्, यसले मलाई समेत तनाव भैरहेको छ”–सुवेदीले भनिन् ।

घर बिक्री गरेका मनरुपा र रत्नखर रेग्मीले चेक बाउन्समा उजुरी हाल्ने तयारी गरे पनि खरीदकर्ता गिरीले नगद ल्याएर दिन्छु भन्दै झुलाएर ६ महिना कटाएको र अहिले काठमाडौंमा बस्दै आएको पीडितहरुले बताएका छन् । चेक काटेको मिति ६ महिना नाघेमा चेक बाउन्समा उजुरी नलाग्ने ब्यवस्था छ । पीडितले आफूहरुमाथि ठगी गरेको भन्दै जिल्ला प्रहरी कार्यालय रुपन्देहीमा उजुरी दिएका छन् । तर प्रहरीले यसबारेमा कुनै कारवाही अघि बढाएको पाइएको छैन ।

अहिले उक्त घर सिर्जना श्रेष्ठको नाममा पास गरेको पाइएको छ । मध्यस्थकर्ताको भूमिका खेलेकी माया सुवेदीले उक्त घर दृष्टिबन्धक राखी बैंकबाट क्रृण निकाल्नको लागि सिर्जनाको नाममा नामसारी गरेको पाइएको बताइन् ।