खोज

बुटवल, १३ भदौ । नेपाली क्रिकेट फयानहरु एसिया कपको उद्घाटन खेलको ब्यग्र प्रतिक्षामा छन । ऐतिहासिक खेलका रुपमा नेपाली क्रिकेट टिमले पहिलोपटक खेल्न लागेको ठुलो प्रतियोगिता भएकाले पनि सम्पुर्ण नेपालीका लागी यो गौरवको क्षण हो । पाकिस्तानको मुल्तान क्रिकेट मैदानमा नेपालले पाकिस्तानसंग उद्घाटन खेलमा नेपाली समयअनुसार दिउँसो सवा ३ बजे प्रतिस्प्रर्धा गर्ने छ । प्रतिक्षाको घडी कम हुदै जादा फयानमा थप उत्साह र आफनो टिमप्रतिको सर्पोट सामाजिक संजालमा रंगाएको भेटिन्छ ।

रुपन्देहीका क्रिकेटप्रेमीहरु आजको खेल समुहमा बसेर वा चोकचोकमा सर्वसाधारणको पहुचमा पुग्ने गरि ठुलो स्क्रीन बोर्ड लगाएर प्रत्यक्ष प्रशारण गर्ने तयारीमा जुटेका छन । बुटवलको सबैभन्दा धेरै मानिसहरुको भिड हुने चोकमध्येको एक देविनगर चौपारीमा वेष्ट्रन क्रिकेट एकेडेमीको पहलमा प्रोजेक्टरबाट लाईभ गर्ने तयारी छ । नेपाली टिमको ऐतिहासिक खेललाई प्रत्यक्ष देखाउने ब्यवस्था गर्न लागेको एकेडेमीका संचालक भुवन पाण्डेले बताए । देविनगर चौपारीमा १५ बाई १५ फुटको स्क्रिनमा देखाईने उनले बताए । ‘नेपालमा क्रिकेटप्रतिको क्रेज छ ।’—उनले भने । धेरै सर्वसाधारण जो क्रिकेट लाईभ हेर्न चाहन्छन उनीहरुलाई लक्षित गरी निशुल्क देखाउन लागेको उनले बताए । प्रत्यक्ष प्रशारणको लागि वल्र्डलिंकले सहकार्य गरेको उनले बताए ।

यता रुपन्देहीका अधिकाश रेष्टुरेन्टहरुमा ठुलो स्क्रिनमा क्रिकेट लाईभको ब्यवस्था गरिएको छ । गोलपार्कस्थित लेभिस रेष्टुरेन्टमा एलईडीबाट क्रिकेट खेलको प्रत्यक्ष प्रसारण गर्न लागेको बुटवल क्रिकेट विकास समितिका उपाध्यक्ष, खेलप्रेमी तथा रेष्टुरेन्ट ब्यवसायी रोमित बज्राचार्यले बताउछन । युवाहरुमा बढ्दो क्रिकेट क्रेज र नया पुस्ताको मागलाई बुझेर सेवाको ब्यवस्था गरिएका उनले बताए । ९ बाई ९ फिटको स्क्रिन राखिएको उनले बताए । यो खेलमा जितहारभन्दा पनि नेपाली क्रिकेटको उपलब्धिलाई हामीले गौरवका रुपमा लिनुपर्ने उनको धारणा छ ।
योगीकुटीस्थित होटल पौवामा पनि प्रत्यक्ष प्रसारणको तयारी गरेको छ । मौसम अनुकुल भए प्रोजेक्टरबाट बाहिर १५ बाई १५ फुटको स्क्रिनमा र पानी पर्ने जस्तो भए १२ बाई ८ फुटको भित्री ठुलो हलमा देखाउने तयारीमा रहेको होटलका बिएन निशान खरेलले बताए । हलमा ३ सय जना अट्ने क्षमता रहेको छ ।

होटल तथा रेष्टुरेन्ट ब्यवसायी संघ रुपन्देहीका अध्यक्ष लेखनाथ भण्डारीले अधिकास होटलहरुमा प्रत्यक्ष प्रसारण गर्ने बताए । होटलहरुमा आर्कषणका रुपमा ठुलो स्क्रिन अनिवार्यजस्तो भएको भन्दै फुटबल, क्रिकेटका ठुला प्रतियोगिता हुदा ब्यवसायमा समेत सकारात्मक प्रभाव पर्ने गरेको उनले बताए । रुपन्देहीको भैरहवा, मणीग्राम लगायतका ठाउमा पनि स्थानिय खेलप्रेमीहरु ठुलो स्क्रिनमा प्रत्यक्ष प्रसारण हेर्ने तयारीमा छन ।

नेपालले आफ्नो क्रिकेट इतिहासमा पहिलो पटक विश्व वरियताको नम्बर एक टोली पाकिस्तानसँग खेल्न लागेको हो । अर्कोतर्फ पाकिस्तान दुई पटक एसिया कपको उपाधि विजेता समेत हो । गत अप्रिल–मेमा सम्पन्न एसीसी मेन्स प्रिमियर कप क्रिकेटको उपाधि उचालेर नेपाल एसिया कपमा छनोट भएको हो । यूएई र हङकङ सम्मिलित प्रतियोगितामा नेपाल च्याम्पियन भएर प्रतियोगिताका लागि छानिएको हो । यसअघिको एसिया कपमा युएई र हङकङले खेलेका थिए ।

नेपाली टोली रोहित पौडेलको कप्तानीमा मैदान उत्रनेछ । पाकिस्तानी टोलीको कप्तानी भने बाबर आजमले गर्नेछन् । पाकिस्तान आईसीसी एकदिवसीय वरियतामा शीर्ष स्थानमा छ । त्यस्तै भारत तेस्रो स्थानमा छ भने नेपाल वरियतामा १५ औँ स्थानमा छ । ६ टोली सहभागी प्रतियोगिताको समूह ‘ए’ मा नेपाल, भारत र पाकिस्तान छन् भने समूह ‘बी’ मा बंगलादेश, श्रीलंका र अफगानिस्तान छन् । भदौ ३१ गतेसम्म चल्ने प्रतियोगितामा नेपाल र भारतबीचको खेल भदौ १८ गते श्रीलंकाको काण्डीमा हुनेछ ।

प्लेइङ ११

नेपाल – कुशल भुर्तेल, आसिफ सेख (विकेटकिपर), भीम सार्की, रोहित पौडेल (कप्तान), कुशल मल्ल, दीपेन्द्रसिंह ऐरी, गुलशन झा, सोमपाल कामी, करण केसी, सन्दीप लामिछाने र ललित राजवंशी ।
पाकिस्तान – बाबर आजम (कप्तान), सदाब खान (उपकप्तान), फकर जमान, इमाम–उल–हक, सलमान अली अघा, इफ्तिखर अहमद, मोहम्मद रिजवान (विकेटकिपर), मोहम्मद नवाज, नसिम साह, साहिनसाह अफ्रिदी, ह्यारिस रौफ ।