खोज

न्युज बुटवल टुडे

तिलोत्तमा, ८ भदौ ।

संघीय सरकारले बनाएको ६ लेन सडकको झिलिमिलीले चर्चा कमाएको तिलोत्तमा नगरपालिकाको अधिकांश भित्री सडकहरुको हालत भने बिजोग भएको छ ।

पुराना र सांघुरा सडकहरु जीर्ण हुंदा जताततै खाल्डैखाल्डा छन् । यस्तै बिजोग हालत ड्राइभरटोल–शिवपुर सडकको भएको छ । उक्त सडक खण्डको नमुना टोल,शिवचोक देखि ज्योतिनगर हुंदै जनभावना स्कुलसम्म सयौं खाल्डा छन् । सांघुरो र जीर्ण सडकमा वर्षा हुंदा खाल्डाहरु पानीले भरिएर पोखरी बन्ने गर्छन् । जसले गर्दा सवारी साधन चलाउन निकै कठीन हुने गरेको स्थानीयहरुको गुनासो छ ।

सडक निकै सांघुरो भएकाले बस ट्रक गुडेको बेला ईरिक्सा, मोटरसाइकल, साइकललाई साइड लाग्ने ठाउं पनि नहुंदा कुन बेला ठूलो दुर्घटना हुने हो भन्न नसकिने स्थानीय बताउंछन् ।

तिलोत्तमा नगरपालिका वडा नंं ८ को कार्यालय अगाडिको थोरै भाग पिच भएपनि बांकी अधिकांश सडक खण्डमा यात्रा गर्न नसकिने अवस्था छ । सो खण्ड भएर यात्रा गर्ने नागरिकहरु शिवपुर मणिग्राम सडकको लामो दुरीमा यात्रा गर्न वाध्य छन् ।

सडकको दुरावस्थाप्रति इंगित गर्दै सामाजिक अगुवा केशवराज न्यौपानेले त्यहां डुंगा चलाउन तिलोत्तमा नगरपालिकाले आयोजना गरेको सार्वजनिक सुनुवाईमा ब्यङग्य गरेका थिए ।

उक्त सडक खण्डमा तत्काल गुणस्तरीय मर्मत गर्न स्थानीयको माग छ । ६ लेन सडक मात्रै मुसारेर र देखाएर उत्कृष्ट नगरपालिका भन्दै प्रचार गर्नु गलत भएको भन्दै नगरवासीले सबै भित्री सडक स्तरोन्नति गर्न माग गरेका छन् ।

उक्त खण्डमा सडकको जग्गा केही स्थानीयले अतिक्रमण गरेकाले सडक सांघुरो भएको र अतिक्रमण गरेका व्यक्तिले सडकको जगा छाड्न तयार नभए एशियाली विकास बैंकको ऋणमा स्तरोन्नति हुने प्रकृयामा रहेको सडक नबन्ने खतरा पनि उत्तिकै रहेको छ ।

अधिकांश स्थानीयले सडकको जग्गा अतिक्रमण गर्नेले उक्त सार्वजनिक जग्गा नछाडे आफूहरुले सडक विस्तारका लागि जग्गा नछाड्ने अडान राखेका छन् । ड्राइभरटोल–शिवपुर सडक जस्तै मंगलापुर–कान्छिबजार सडकको हालत पनि वर्षौंदेखि बिजोग छ ।

तस्विरहरुः टिआर शर्मा