खोज

बुटवल, २० साउन ।

लुम्बिनी प्रदेश यु–१९ छनौट बुटवलमा सुरु भएको छ । आगामी भदौमा काठमाडौंमा आयोजना हुने साफ प्रतियोगितालाई लक्षित गरी देशभर एन्फाले खेलाडी छनौट संचालन गरेको छ । लुम्बिनी प्रदेशको छनौट देविनगरस्थित एन्फा एकेडेमी सेन्टरमा शनिबारदेखि शुरु भएको अखिल नेपाल फुटबल संघ, लुम्बिनी प्रदेशका उपाध्यक्ष होम क्षेत्रीले बताए ।

साउन २० र २१ गरी दुई दिन हुने छनौटमा १ सय ४० बढी खेलाडीहरु आएको उनले बताए ।
‘छनौट भएका खेलाडीहरु काठमाडौंमा क्लोज क्याम्पमा बस्नेछन्’— उनले भने । अन्तिम २५ खेलाडी हुँदै प्लेईङ सेटमा पर्ने खेलाडीहरु भदौ ४ देखि १३ काठमाडौंमा हुने साफ प्रतियोगितामा नेपाली टिमबाट खेल्ने छन् ।

लुम्बिनी प्रदेशबाट खेलाडी छनौटका लागि प्रशिक्षक याम प्रसाद गुरुङ, पुकार गहतराज, युवराज शाहीलाई जिम्मेवारी दिइएको छ । विभिन्न समूहमा विभाजन गरेर प्रतिष्पर्धा गराई खेलाडीहरुको छनौट गरिरहेको उनले बताए । लुम्बिनी प्रदेशका १२ जिल्ला मध्ये एन्फाका रुपन्देही, बर्दिया, बाँके, दाङ, पाल्पा, नवलपरासी गरी ६ जिल्लामा शाखा छन् । यसबाहेकका गुल्मी, पाल्पा, कपिलबस्तु, सल्यानबाट समेत खेलाडीहरु आएका छन् । एन्फा यु १९ टिमको हेड कोच सुनिल श्रेष्ठ र सहायक कोच सचिन धिमाल रहेका छन् ।