खोज

नवलपुर, १७ साउन ।

नयाँ जिल्लाका रुपमा निर्माण हुन लागेको नवलपरासी पुर्वको कावासोतीमा बन्न लागेको नमुना सदरमुकामको शिलन्यास भएको पाँच बर्ष बित्नै लाग्यो । सुरुका वर्षमा केही काम भए पनि अहिले भने सबै काम बन्द भएपछि नमुना सदरमुकाम बन्ने संभावना टर्दै गएको छ ।

कावासोती नगरपालिका–३ मा रहेको ज्योतिकुञ्ज सामुदायिक वनभित्र रहेको एक सय ८६ विगाहा जग्गामा नमुना सदरमुकाम बनाउनका लागि नेपाल सरकारको नाममा श्रेस्ता कायम भए पनि अहिले सम्म भौतिक निर्माणको काम नै हुन नसकेको र प्राप्त हुने बजेट पनि त्यसै फ्रिज भएर जाने गरेको नेपाली काँग्रेस नवलपुरका कार्यबाहक सभापति चन्द्रबहादुर रानामगर बताउँछन् ।

२०७६ वैशाख ७ गते पुर्व प्रधानमन्त्री केपी शर्मा ओलीबाट शिलान्यास भएको नमुना सदरमुकाममा शिलान्यासको पाँच वर्ष बित्न लाग्दा सम्म कुुनै पनि भौतिक पूर्वाधारहरु निर्माण सुरु हुन सकेका छैनन् । अहिले त यहाँ आएको झण्डै ५० करोड बजेट काम नभएपछि फ्रिज भएर गएको जिल्ला प्रशासन कार्यालयले जनाएको छ ।

राजनीतिक खिचातानी र सरकार छिनछिनमा फेरबदल भैरहने जस्ता धेरै कारणले पनि नमुना सदरमुकाम निर्माणले गति लिन नसकेको नेकपा एमाले नवलपुरका जिल्ला उपसचिव भीम कंडेलले बताए ।

६ महिना अघिसम्म पटक–पटक नमुना सदरमुकाम निर्माण गर्ने बैठकहरु हुने गर्थे । प्रमुख जिल्ला अधिकारीको बारम्बार पहलमा हुने बैठकले निर्माण कार्यलाई तीब्रता दिने निर्णय गरिन्छ । कागजमा लेखिन्छ, तर भवन निर्माणको कार्यबिधि र श्रोत सुनिश्चितताको लागि खासै कार्यान्बयन हुुन नसकेको बताउँछन कावासोती नगरपालिकाका नगर प्रमुख विष्णुप्रसाद भुसाल ।

सुरुमा प्रारम्भिक गुरुयोजना सम्पन्न गर्न ३६ अर्ब ४३ करोड लागत अनुमान गरिएको सो नमुना सदरमुकाम सम्पन्न गर्न अहिले भने प्रारम्भिक पुनरावलोकनमा रु १६ अर्ब लाग्ने अनुमान गरिएको भवन डिभिजन भरतपुरले जनाएको छ ।

आर्थिक वर्ष २०७९÷८० मा नमूना सदरमुकामको सरकारी भवन निर्माणका लागि रु १० करोड र शहरी विकास कार्यक्रम अन्तर्गत रु ३३ करोड ९५ लाख विनियोजित भएकोमा सो अनुसारको कुनै भवन निर्माण हुन नसकेपछि सबै रकम फ्रिज भएर गएको भवन डिभिजन कार्यालयले जनाएको छ ।

एकीकृत रुपमा एकै ठाउँमा जिल्लास्थित सरकारी कार्यालयहरु हुँदा सेवाग्राहीहरुले एकै ठाउँबाट सबै काम पुरा गर्न पाउने र छिटो छरितो समेत हुने परिकल्पना गरेर नै नमुना सदरमुकामको अवधारणा अगाडि सारिएको सहायक प्रमुख जिल्ला अधिकारी सुभाषकुमार लामिछानेले बताए ।

अलपत्र नमुना सदरमुकाम बन्ने छाँट नै छैन । अहिले त कसैले यसको बारेमा चासो लिन समेत छाडेको कावासोतीबासीहरुको गुनासो रहेको छ । नमुना सदरमुकामको परिकल्पना गरेर १८६ बिगाहा जमीन एकीकृत पारे पनि यो सपनामै सीमित हुने होकी भन्ने आम चिन्ता बढेको जिल्ला समन्बय समितिका पुर्व प्रमुख चेसराम आले मगरले बताए ।