खोज

सल्यान, १७ साउन ।  बेमौसमी तरकारी उत्पादनमा अब्बल बनेका सल्यानका कपुरकोटका किसानले एक किलो टमाटरको १ सय ४० रूपैयाँ पाएका छन् । विगत केही बर्षमा न्युनतम १० रूपैयाँ किलो मा समेत टमाटर बिक्री गर्दै आएका किसानहरूले यो पटक हाल सम्मकै उच्च मूल्य पाएका हुन ।

सल्यानका किसानले हाल सम्मकै उच्च मुल्यमा आफुले उत्पादन गरेको टमाटर विक्री गरेका छन् । बेमौसमी तरकारी खेती हुने कपुरकोट क्षेत्रका किसानले मंगलबार टमाटर बिक्रि गर्दा किलोमै १४० रूपैयाँ हात पारे । यो हाल सम्मकै राम्रो मूल्य रहेको किसानहरूले बताएका छन् ।
मंगलबारको तरकारी हाट बजारमा मात्रै ६० लाख ४८ हजार ९४८ रूपैयाँ बराबरको ताजा तरकारी र फलफुल कपुरकोटबाट विक्रि भएको छ । कृषि उपज बजार केन्द्रका अनुसार ६८ हजार २८९ किलो कृषिजन्य वस्तु विक्रिबाट एकैदिन यती धेरै रकम किसानको हात परेको हो । यसमध्ये ४३ लाख बढी रकम टमाटर विक्रिबाट मात्रै आम्दानी भएको छ । ३१ हजार ३०० किलो टमाटर विक्रिबाट ४३ लाख ३ हजार ७५० रूपैयाँ, ४ हजार ५६५ किलो काउली विक्रिबाट १ लाख ९४ हजार १२ रूपैयाँ, ३ हजार ८९५ किलो भेडे खुर्सानी विक्रिबाट ३ लाख १ हजार ८६५ रूपैयाँ र ११ हजार ७०० किलो बन्दा विक्रिबाट २ लाख ४ हजार ७५० रूपैयाँ जिल्ला भित्रिएको बजार केन्द्रले जनाएको छ ।

मिहेनत गरेर उत्पादन गरेको तरकारीले उचित मूल्य पाएकोमा किसानहरू हर्षित देखिन्थे । करिव दुई क्विन्टल टमाटर बिक्रि गरेकी कपुरकोट ३ निबासी कृषक रामकली बिकले सदैव राम्रो मूल्य पाएमा किसानको मिहेनत सार्थक हुने बताइन् । कृषि उपज बजार केन्द्र कपुरकोटका अनुसार मंगलबारको तरकारी बजारमा टमाटर प्रतिकिलो १३५ देखि १४० सम्म, पुरानो अदुवा १४० देखि १५० मा किनबेच भएको हो । यस्तै किसानले अकबरे खुर्सानी १०० देखि १०५, भेडे खुर्सानी ७५ देखि ८०, काउली ४० देखि ४५, बन्दागोभी १० देखि १५ रूपैया प्रतिकिलो बिक्रि भएको बजार केन्द्रका बजार प्रतिनिधि चन्द्रमणी खड्काले जानकारी दिए । सिमि ४५ देखि ५० रूपैया प्रतिकिलो बिक्रि गरेका किसानले लोकल कांक्रा ५० देखि ५५ र उन्नत कांक्रा १० देखि १२ रूपैयाँ प्रतिकिलो बिक्रि गरेका हुन ।

कपुरकोट गाउँपालिकाभित्र र आसपासका क्षेत्रमा बैमौसमी तरकारी खेती हुँदै आएको छ । कपुरकोट क्षेत्रमा उत्पादन भएको तरकारी दाङ, नेपालगन्ज, बुटवल, नारायणगढ, पोखरा, कैलाली लगाएतका शहर बजारमा जाने गरेको छ । कपुरकोटमा हप्ताको मंगलबार र शुक्रबार तरकारि बजार लाग्ने गर्दछ भने अन्य दिनमा पनि कपुरकोट गाउँपालिकाका ६ वटै वडामा रहेका तरकारि संकलन केन्द्रमा पनि किसानहरूले आफ्नो उत्पादन विक्रि गर्नेगर्दछन् ।