खोज

बुटवल, १५ साउन ।

उद्योगी महिलाहरुलाई सघाएर महिला उद्यमशीलता प्रवद्र्धन गर्न भन्दै रुपन्देहीमा डिजिटल वित्तिय साक्षरता तालिम दिन थालिएको छ ।

घरेलु तथा लघुउद्यम गरिरहेका महिलालाई छनोट गरी तालिम दिन थालिएको हो । जसमा डिजिटल माध्यमबाट कसरी व्यवसाय गर्ने, बजारीकरण गर्ने, रकम लेनदेन गर्ने भन्नेबारेमा सिकाइएको थियो । बैंक तथा वित्तीय संस्थाबाट कसरी ऋण लिने, ऋण लिने प्रक्रिया कसरी थाहा पाउने, कस्ता कागजात कसरी मिलाउने, ऋणको किस्ता कसरी तिर्ने भन्नेबारेमा समेत सिकाउने गरिएको छ । सरकारले ल्याएका अनुदान र सहुलियत ऋण र त्यसलाई लिने प्रक्रियाबारे समेत सिकाइन्छ ।

वमन एक्ट नेपालले वित्तीय साक्षरता र उद्यम प्रवद्र्धनका लागि बुटवल र तिलोत्तमामा उद्यमी महिला सञ्जाल बनाएको छ । उनीहरुलाई उद्यम दर्तादेखि, संचालन, मुनाफादेखि वचतसम्मका प्रक्रिया सिकाउने गरिएको कार्यक्रम संयोजक आनिक रानाले बताइन् । उद्योग स्थापना गरेका, दर्ता प्रक्रियामा नगएकादेखि उद्योग राम्रोसित चलाएका महिलाहरुलाई आवश्यकता अनुसार सहजीकरण गरिरहेको उनले बताइन् । करिब एक वर्षसम्म उनीहरुलाई आवश्यकताका आधारमा सघाउने उनले जानकारी दिइन् ।

सोमबार तिलोत्तमाका उद्यमी महिलाहरुलाई सहजीकरण गरिएको थियो । जसमा उद्योग नविकरण, अडिट, डिजिटल कारोबारदेखि बैंकिङ प्रक्रिया तथा बचतबारे मेटलाइफका प्रतिनिधि शशिधर पराजुलीले सहजीकरण गरेका थिए । तालिममा सहभागी उद्योगी रेखा रानाले डिजिटल वित्तिय साक्षरताले उद्योग प्रवद्र्धनमा धेरै सघाएको बताइन् । साउन १३ मा बुटवल र साउन १५ मा तिलोतमामा आयोजना गरिएको थियो । सो तालिममा ३०–३० जना महिला उद्यमी सहभागी थिए ।