खोज

बुटवल, ८ साउन ।

अर्थमन्त्री डा. प्रकाशशरण महतले अर्थतन्त्र शिथिल बनेका बेला आएको मौद्रिक नीतिले आर्थिक गतविधि बढ्ने संकेत देखिएको बताएका छन् । “नयां मौद्रिक नीतिले शिथिल बनेको अर्थतन्त्र चलायमान हुने देखिएको छ”–उनले भने ।

मौद्रिक नीतिले बैंकहरुको ब्याजदर खुकुलो बनाएकाले निजी क्षेत्रमा पुंजी प्रवाह बढ्न गई लगानीको वातावरण सहज हुने अर्थमन्त्री महतको दावी छ । “मौद्रिक नीतिले पोलिसी रेट ६.५ प्रतिशत तोकेको छ, यसले बैंक ब्याज दर स्वतः खुकुलो हुन्छ र बजारमा पुंजी प्रवाह बढ्छ, जग्गा कारोबार पनि सहज हुन्छ”–उनले भने ।

नेपाल प्रेस युनियन रुपन्देहीले सोमबार बुटवलमा गरेको पत्रकार भेटघाटमा अर्थमन्त्री महतले यस्तो बताएका हुन् । आफूले तस्करीको सुचना दिनेलाई पुरस्कारको व्यवस्था गरेकाले सय केजी सुन पक्राउ परेको दावी गर्दै अर्थमन्त्री महतले यस प्रकरणमा जरैसम्म पुगेर अनुसन्धान हुने बताए ।

सुन बरामद प्रकरणमा अर्थमन्त्री र गृहमन्त्रीले राजीनामा दिनुपर्छ भन्ने कांग्रेस सांसद डा. सुनिल शर्माको अभिव्यक्तिबारे महतले शर्माको अस्पतालले स्वास्थ्य वीमा बोर्डको वीमा रकम नपाएका कारण मनपरी बोलेको बताए ।

अर्थमन्त्री डा. महतले चालु आर्थिक वर्षमा पुँजीगत खर्च बढ्ने दावी पनि गरे । पुँजीगत खर्च बढाउन सरकारले निश्चित समयमै ठेक्का लगाउने व्यवस्था गरेकाले पुँजीगत खर्च बढ्ने उनले बताए । पुँजीगत खर्चमा वृद्धि भएसंगै आर्थिक गतिविधि तीब्ररुपमा बढ्ने अर्थमन्त्रीको दावी छ ।

“नयाँ आर्थिक बर्ष सुरु भएसंगै सरकारको खर्च गर्ने क्षमता बढ्न थालेको छ, यसले समग्र अर्थतन्त्रमा सकारात्मक प्रभाव पर्छ”–अर्थमन्त्री डा. महतले भने ।

वित्त नीति र मौद्रिक नीतिको एउटै लक्ष्य आर्थिक वृद्धि कायम गर्ने रहेकाले सरकारले लक्ष्य पूरा गरेरै छाड्ने उनले अठोट व्यक्त गरे ।

अर्थमन्त्री डा. महतले तत्कालका लागि श्रोतमा केही कमी रहेपनि पुँजीगत खर्च गर्ने अवस्थामा सुधार आउने वित्तिकै देशको आर्थिक क्षेत्रले सुधारको बाटो लिने बताए । “देश विकासलाई प्रमुख प्राथमिकतामा राखेर सरकार अघि बढेकोले निराश भैहाल्नुपर्ने अवस्था छैन”–उनले भने ।

नेपाली कांग्रेसका प्रवक्ता समेत रहेका अर्थमन्त्री डा. महतले नेपाली कांग्रेसको केन्द्रीय समितिको बैठकको प्रत्यक्ष प्रसारण आवश्यकताका आधारमा तय हुने बताए ।

उनले नेपाली कांग्रेसमा भ्रम सिर्जना गर्ने कोशिस भैरहेको भन्दै बाहिर बैठकमा के के न भयो भन्ने हल्ला हुने भएकोले जनतालाई यथार्थ जानकारी दिन बैठकको प्रत्यक्ष प्रसारण भएको बताए ।