© २०२३
बुटवल, २७ जेठ ।
अंग्रेज फौज पराजित भएको स्थल बुटवलको जितगढीमा ग्रेटर नेपालको नक्सा राखिएको छ । भारतले नयाँ संसद भवनमा राखेको अखण्ड भारतको नक्सामा नेपालका भूभाग लुम्बिनी र कपिलवस्तु समेत राखेपछि नेपालमा पनि ग्रेटर नेपालको नक्साबारे चर्चा सुरु भएको छ ।
नेपालले अंग्रेज फौजलाई हराएको बुटवलको जितगढी किल्लामा भने ६ महिनादेखि ग्रेटर नेपालको नक्सा राखिएको हो । ग्रेटर नेपालको नक्सा राख्ने निर्णय २०७४ सालमा बुटवल उपमहानगरपालिकाका तत्कालीन मेयर शिवराज सुवेदीले कार्यपालिका बैठकमार्फत गराएका थिए । तत्कालीन कार्यपालिका बैठकले राष्ट्रिय स्वाभिमानको प्रतिक र वीरताको पहिचान स्थल जीतगढी सम्पदा स्थलमा वीर नेपाली योद्धाको शालिक निर्माण गर्ने, तत्कालीन ग्रेटर नेपालको नक्सा स्थापना गर्ने र हरेक बैशाख ७ गते जितगढी विजय उत्सव दिवस मनाउने ऐतिहासिक निर्णय गरेको थियो ।
त्यसको कार्यान्वयन भने यो वर्ष मात्रै भएको हो । बुटवल उपमहानगरपालिकाका प्रमुख खेलराज पाण्डेयले नेपाली सेना समेतको स्वीकृतीमा एतिहासिक स्थल जितगढीमा ग्रेटर नेपालको नक्सा राखिएको बताए । “काठमाडौंमा ग्रेटर नेपालको नक्सा राख्दा खुवै प्रचार भयो, तर यहाँ प्रचार भएन”–उनले भने ।
जितगढीमा यसअघि नै कर्णेल उजिरसिंह थापा, काजी वीरभञ्जन पॉडे, कुम्भेदान कृपासुर थापा, दलखम्ब थापा, समशेर राना मगर, सरदार सूर्जे थापा, लेफ्टीनेन्ट अम्बर अधिकारी, कुम्भेदान वृषसुर थापा, जमदार भीमसेन देउजा, जमदार शूरवीर बोहरा, हवल्दार रणशूर बानियां, सिपाही हंशवीर अधिकारी तथा थरघर नकुल बानियां र जुठे वस्नेतका शालिक निर्माण भइसकेको छ । त्यसको अनावरण चार वर्षअघि पूर्वप्रधानमन्त्री केपी शर्मा ओलीले गरेका थिए ।