खोज

बुटवल, ३१ वैशाख ।

राष्ट्रिय तथ्यांक कार्यालयले २०७८ सालको जनसंख्या सार्वजनिक गरेको करिव दुई महिना भयो । गत चैत १० गते प्रधानमन्त्री पुष्पकमल दाहालले २०७८ सालको जनसंख्या सार्वजनिक गरेका थिए ।

तर रुपन्देहीका १६ वटै पालिकाका वेबसाईट चेक गर्दा धेरै पालिकाको वेबसाईटमा पुरानै जनसंख्याको विवरण राखिएको छ । पालिकाहरुमा सूचना तथा संचार प्रविधि अधिकृत सरहको दरवन्दी छ । तर, रुपन्देहीका १३ वटा पालिकामा भने वेबसाइट नै अपडेट गरिएको छैन् । अधिकांश पालिकाहरुले आफ्नो वेबसाइटमा २०६८ सालकै जनसंख्या राखिरहेका छन् । यसले पालिकाहरु प्रविधिमा अझै पनि अपडेट नरहेको देखाउँछ । बुटवल उपमहानगरले भने २०७८ सालकै जनसंख्या आफ्नो वेबसाईटमा अपडेट गरेको छ ।

आफूलाई प्रविधिमा अब्बल दावी गर्ने तिलोत्तमा नगरपालिकाले आफ्नो वेबसाईटमा अझै पनि २०६८ सालकै जनसंख्या राखिरहेको छ । नगरपालिकाको संक्षिप्त परिचय भन्ने ठाउँमा तिलोत्तमाको जनसंख्या २०६८ साल अनुसार १ लाख २३ हजार ८२६ उल्लेख छ । जबकि २०७८ को जनगणना अनुसार तिलोत्तमाको जनसंख्या १ लाख ४९ हजार ६५७ रहेको छ ।

सिद्धार्थनगर नगरपालिकाले २०७८ सालको प्रारम्भिक जनसंख्याको विवरण मात्रै अपडेट गरेको छ । अन्तिम नतीजा वेवसाईटमा राखेको छैन । सैनामैना नगरपालिकाले भने वेवसाइटमा जनसंख्याको विवरण उल्लेख नै गरेको छैन । देवदह नगरपालिकाले पनि आफ्नो वेबसाईटमा जनसंख्याको विवरण अझै सच्याएको छैन । उसको वेबसाईटमा अहिले पनि २०६८ सालकै जनसंख्याको विवरण उल्लेख छ ।

त्यसैगरी लुम्बिनी सांस्कृतिक नगरपालिकाले पनि आफ्नो आधिकारिक वेबसाईटमा जनसंख्याको विवरण सच्याएको छैन । उसको वेबसाईटमा अझै पनि २०६८ सालकै जनसंखया छ । रोहिणी गाउँपालिकाले जनसंख्याको विवरण नै वेबसाईटमा राखेको छैन भने मायादेवी गाउँपालिकाले २०६८ सालकै जनसंख्यालाई आधार मानेर काम गरिरहेको छ ।

शुद्धोधन गाउँपालिकाले भने आफ्नो वेबसाईटमा २०७८ कै जनगणना अपडेट गरेको छ । सियारी गाउँपालिकाले पुरानै अर्थात २०६८ कै जनगणना अनुसारको जनसंख्या आफ्नो आधिकारिक वेबसाइटमा उल्लेख गरेको छ । कन्चन गाउँपालिकाले पनि पुरानै जनगणना अनुसारको विवरण वेबसाईटमा राखिरहेको छ । रुपन्देहीको समरीमाई गाउँपालिकाले भने नयाँ जनसंख्याको विवरण नै पालिकाको वेबसाइटमा अपडेट गर्न सफल भएको छ । मर्चवारी गाउँपालिकाले जनसंख्याको विवरण त राखेको छ तर २०६८ वा २०७८ कुन सालको जनसंख्या हो त्यो नै उल्लेख गरेको छैन ।

ओमसतिया, कोटहीमाई र गैंडहवा गाउँपालिकाले पनि पछिल्लो जनगणना अनुसारको जनसंख्या राखेका छैनन् । हरेक पालिकामा आईटी विज्ञ तालिम प्राप्त कर्मचारी कार्यरत छन् । तरपनि उनीहरुले नियमित पालिकाको वेवसाई अपडेट गरेको देखिदैन ।