खोज

दाङ, ९ फागुन ।

एमाले पोलिटब्यूरो सदस्य एवं लुम्बिनी प्रदेशका मुख्यमन्त्री लिला गिरीले पार्टी संगठन बलियो बनाउँदै जनताको आवाज सुन्न र सम्बोधन गर्न तल्लो तहसम्म निरन्तर रुपमा जोडिन नेता कार्यकर्तालाई निर्देशन दिएका छन् ।

नेकपा एमालेको मिसन द ग्रासरुट अभियानको थालनी अघि आज पार्टी कार्यालय दाङमा आयोजित मिसन ग्रास रुट पार्टी सुदृढीकरण तथा बिस्तार अभियान अन्तर्गत जिल्ला स्तरीय अभिमुखीकरण तथा प्रशिक्षण कार्यक्रमलाई सम्बोधन गर्दै सह–ईन्चार्ज गिरीले पार्टीको गतिविधी जनताको बीचमा लैजान तथा उनीहरुको अवस्थालाई पार्टीको नीति सिद्धान्तमा समावेश गर्न तल्लो तहसम्मको अभियानमा जुट्न निर्देशन दिएका हुन् ।

उनले जनताको रायसँगै पार्टीको नीति सिद्धान्त अनुसार नेता चल्नुपर्ने बताए । जिल्लाको पार्टी संगठन बलियो बनाउन तल्लो तहबाट जनताको कुरा सुनेर अघि बढ्न सचेत गराउँदै जनतासँग एकाकार भएर काम गर्नुपर्नेमा जोड दिए । जनताले राजनीतिक कुरा सहज रुपमा नबुझ्ने हुँदा पारिवारिक, सामाजिक, सांस्कृतिक, आर्थिक अवस्थाका बारेमा सहज रुपमा खुलेर हातेमालो गरेर पार्टीको नीति, विचार र सिद्धान्तलाई जनताका बीचमा लैजाने काममा खटिन निर्देशन दिए ।

मिशन ग्रासरुटलाई बलियो बनाउन सबैले आफ्नो कामको समीक्षा गर्दै पार्टीको विधि, पद्धति र सिद्धान्तलाई अक्षरश पालना गर्न उनको आग्रह थियो ।

जिल्लाका सबै पालिकाका सय वटै वडामा जनताको आवश्यकता, समस्या, धारणा, अवस्थाका बारेमा निर्मम समीक्षा गरेर उनीहरुको हितका पक्षमा पार्टीले नीति बनाउने हुँदा यसलाई तोकिएको जिम्मेवारी अनुसार पालना गर्न सचेत गराए ।

अभिमुखीकरण कार्यक्रममा पार्टी केन्द्रीय सदस्य तथा लुम्बिनी प्रदेशका खानेपानी, ग्रामीण तथा शहरी विकास मन्त्री चेतनारायण आचार्यले संघ, प्रदेश र जिल्ला कमिटिहरु मजबुत बनाउदै लैजानुपर्ने बताए । पार्टी बलियो भयो भने मात्रै सक्षम नेतृत्व हुने भएकाले नेता कार्यकर्ताले यता ध्यान दिन आग्रह गरे ।

कार्यक्रममा केन्द्रीय सदस्य तथा राष्ट्रिय सभा सदस्य कुमार दसौदी, केन्द्रीय सदस्य तथा प्रतिनिधि सभा सदस्यद्वय दिपा शर्मा र शोभा ज्ञवालीले आफ्नो धारणा राखेका थिए । जिल्लास्थित नेता कार्यकर्ता, पार्टी सदस्य सहभागी कार्यक्रमको अध्यक्षता जिल्ला अध्यक्ष हुकुम बस्नेतले गरेका थिए भने कार्यक्रमको सहजीकरण सचिव मनोहर बुढाथोकीले गरेका थिए ।