खोज

बुटवल, ५ फागुन ।

यातायात मजदूर तथा व्यवसायी भलाई कोष रुपन्देहीको अध्यक्षमा दोस्रोपटक दिनेश फुल्लेल निर्वाचित भएका छन् । शुक्रबार भएको निर्वाचनमा प्रतिष्पर्धी डिलबहादुर थापालाई फराकिलो मतान्तरले हराउँदै फुल्लेल निर्वाचित भएका हुन् ।

फुल्लेलले ३०९ मत प्राप्त गर्दा थापाले ८९ मत ल्याएका थिए । त्यस्तै निर्वाचनबाट महासचिवमा योगबहादुर गुरुङ ३२८ मत ल्याई विजयी भएका छन् भने उनका प्रतिष्पर्धी मुक्तिराख खरेलले ७१ मत ल्याए । त्यसैगरी कोषाध्यक्ष पदमा प्रकाशकुमार नेपाल विजयी भएका छन् । उनले ३२७ मत प्राप्त गर्दा प्रतिष्पर्धी चिरन्जीवी पाण्डेले ७१ मत पाए ।

१७ सदस्यीय कार्यसमितिमा अरु सबै पद भने सर्वसम्मत भएको थियो । कोषको उपाध्यक्षमा छविलाल थापा, सचिवमा विजेश न्यौपाने निर्विरोध निर्वाचित भए भने सदस्यहरुमा किशोर क्षेत्री, भक्तिराम शर्मा, अमित अधिकारी, लालकाजी गुरुङ, दिलीप कार्की, श्याम गैरे, अर्जुनकुमार बन्जाडे, सुदर्शन धिताल, चेतबहादुर गुरुङ, लक्ष्मीप्रसाद पाण्डे, नरबहादुर रजाली र प्रकाश गैरे पनि सर्वसम्मत चुनिए ।

काँग्रेस र एमाले निकट मजदूर व्यवसायीहरुले साझा प्यानलको रुपमा दिनेश फुल्लेलको नेतृत्वलाई अगाडि सारे पनि काँग्रेसको अर्को समूहले भने एकीकृत समाजवादीसँग मिलेर थापाको नेतृत्वमा छुट्टै प्यानल खडा गरेको थियो । तर सो प्यानलका तीनैजना उम्मेदवार फराकिलो अन्तरले पराजित हुन पुगे । २०६५ यता सर्वसम्मत नेतृत्व चयन हुँदै आएको भलाई कोषमा १४ वर्षपछि मतदान भएको हो ।

विजयी भएपछि बोल्दै नवनिर्वाचित अध्यक्ष फुल्लेलले यातायात व्यवसायी तथा मजदूरको हितमा संस्थालाई एकतावद्ध बनाएर लैजाने प्रतिवद्धता जनाए । उनले प्रतिष्पर्धामा हारजित स्वाभाविक रहेको भन्दै सबैको भावनालाई समेटेर अघि बढ्ने बताए ।

नवनिर्वाचित पदाधिकारी तथा सदस्यहरुलाई निर्वाचन समितिले शुक्रबार नै सपथग्रहण गराएको थियो भने प्रमाणपत्र प्रदान गरेको थियो । त्यस अवसरमा बोल्दै कोषका पुर्व अध्यक्ष एवं मानार्थ सदस्य कुमार थापाले आगामी दिनमा कोषको कार्यसमितिमा महिला सहभागिता पनि हुने गरी विधान संशोधन गरिने बताए ।

निर्वाचन समितिका संयोजक रामराज पोखरेल र सदस्य खिमानन्द भट्टराई निवनिर्वाचत टिमलाई बधाई तथा शुभकामना दिंदै सफल कार्यकालको कामना गरेका थिए ।