© 2026
१४ भाद्र २०८३, आइतबार
१४ भाद्र २०८३, आइतबार
काठमान्डौँ ।
सरकारले माथिल्लो त्रिशूली ‘३ ए’ जलविद्युत् आयोजनामा फसेका मानिसहरूको उद्धार कार्य निरन्तर भइरहेको जनाएको छ । आइतबार बिहान आयोजनास्थलमा पुनः बाढी आए पनि उद्धार कार्यलाई निरन्तरता दिइने जनाइएको छ ।
प्रधानमन्त्री कार्यालयले आइतबार बिहान जारी गरेको सूचनामा आयोजना क्षेत्रमा पूर्ण सतर्कताका साथ समग्र क्षति र परिस्थितिको अवलोकन गर्दै माटो तथा लेदो हटाउन डोजर र भारी उपकरण पुनः परिचालन गर्ने तयारी भइरहेको जनाएको छ ।
त्यस्तै, पहिरो र माटोले पुरिएको टनेल पोर्टल तथा पावर हाउस नियन्त्रण गर्ने १९ वटा सीसीटीभी क्यामेरा, एचडीआर र सेटअप बक्सलगायत महत्त्वपूर्ण उपकरण सुरक्षित रूपमा निकाल्न हेलिकप्टरमार्फत ‘स्पेसल फोर्स’ परिचालन गर्ने तयारी गरिएको प्रधानमन्त्री कार्यालयले जनाएको छ ।
सडक पहुँच अवरुद्ध भएकाले पुरिएको भवन नजिकै हेलिकप्टरबाट टोली उतारेर ती महत्त्वपूर्ण उपकरण निकाल्ने तयारी गरिएको समेत कार्यालयले जनाएको छ ।
बाढीका कारण आयोजनास्थलमा फसेका मानिसहरूको उद्धार कार्य गएको रातभरि नै निरन्तर जारी रहेको जनाइएको छ । आज बिहान करिब ४ बजे आयोजना क्षेत्रमा पुनः बाढी आएपछि त्रिशूली नदीको जलसतह ५ देखि १० मिटरसम्म बढेको प्रधानमन्त्री कार्यालयले जनाएको छ ।
नदीको जलसतह अत्यधिक बढेपछि आयोजनास्थलको किनार तीव्र रूपमा कटान हुन थालेको समेत कार्यालयले जनाएको छ ।
© 2026
All rights reserved.
Design & Developed By:
