सामग्री खोज्नुहोस्

बुटवल ।

बुटवलस्थित लुम्बिनी प्रादेशिक अस्पतालको स्वास्थ्य सेवा थप गुणस्तरीय, व्यवस्थित, पारदर्शी र सेवाग्राहीमैत्री बनाउन माग गर्दै नेपाल कम्युनिष्ट पार्टी (माओवादी) रुपन्देही जिल्ला समितिले अस्पताल प्रशासनलाई २४ बुँदे ध्यानाकर्षण पत्र बुझाएको छ । अस्पतालमा सेवा प्रवाह सुधार, जनशक्ति व्यवस्थापन, पूर्वाधार विस्तार, अत्याधुनिक उपकरणको व्यवस्था, औषधि आपूर्ति, सुशासन तथा सेवाको गुणस्तर अभिवृद्धिका लागि आवश्यक कदम चाल्नुपर्ने मागसहित उक्त ध्यानाकर्षण पत्र पेश गरिएको हो ।

ध्यानाकर्षण पत्रमा अस्पतालमा दैनिक उपचारका लागि आउने बिरामीको चापलाई ध्यानमा राखी ओपिडी सेवा थप व्यवस्थित गर्नुपर्ने, डिजिटल टिकट तथा अनलाइन दर्ता प्रणाली लागू गरी सेवाग्राहीको समय बचत गर्नुपर्ने, उपचार प्रक्रियालाई छिटो, सरल र प्रविधिमैत्री बनाउनुपर्ने उल्लेख गरिएको छ ।

त्यसैगरी इमर्जेन्सी सेवा, आईसीयू, एचडीयू, डायलाइसिस तथा विशेषज्ञ चिकित्सकीय सेवाको क्षमता विस्तार गर्नुपर्ने, आवश्यक जनशक्ति व्यवस्थापन गर्नुपर्ने र बिरामीले सहज रूपमा उपचार सेवा प्राप्त गर्ने वातावरण तयार गर्नुपर्ने माग गरिएको छ । अस्पतालमा अत्यावश्यक औषधि, स्वास्थ्य बीमा अन्तर्गत उपलब्ध हुने सेवा तथा स्वास्थ्य सामग्रीको नियमित आपूर्ति सुनिश्चित गर्न पनि पत्रमार्फत आग्रह गरिएको छ ।

ध्यानाकर्षण पत्रमा अस्पतालभित्र हुने सम्भावित अनियमितता, बिचौलियाको प्रभाव तथा सेवामा देखिने ढिलासुस्ती नियन्त्रण गर्न प्रभावकारी अनुगमन प्रणाली विकास गर्नुपर्नेमा जोड दिइएको छ । अस्पताल प्रशासनले पारदर्शी कार्यप्रणाली अपनाई सेवाग्राहीको विश्वास कायम गर्नुपर्ने र सुशासनलाई संस्थागत गर्नुपर्ने माग पनि पत्रमा समेटिएको छ ।

यस्तै, लुम्बिनी प्रादेशिक अस्पताललाई दीर्घकालीन रूपमा मेडिकल कलेजका रूपमा विकास गर्न आवश्यक पहल थाल्नुपर्ने, त्यसका लागि संघ, प्रदेश तथा स्थानीय तहबीच समन्वय गरी आवश्यक पूर्वाधार, जनशक्ति र बजेट व्यवस्थापन गर्नुपर्ने सुझाव समेत दिइएको छ ।

ध्यानाकर्षण पत्र बुझाउँदै नेकपा (माओवादी) रुपन्देहीका जिल्ला सचिव बिरेन्द्र सीले लुम्बिनी प्रदेशका साथै पश्चिम नेपालका विभिन्न जिल्लाका नागरिक उपचारका लागि यस अस्पतालमा निर्भर रहेको उल्लेख गर्दै अस्पतालको सेवा स्तर अझै सुधार गर्नुपर्ने आवश्यकता रहेको बताए ।

उनले अस्पतालले उपलब्ध गराउने स्वास्थ्य सेवा प्रभावकारी, सहज, गुणस्तरीय तथा सेवाग्राहीमैत्री बनाउन प्रशासनले विशेष प्राथमिकता दिनुपर्ने बताए । बिरामीले उपचारका क्रममा झन्झट, अनावश्यक प्रतीक्षा तथा विभिन्न समस्याको सामना गर्नुपरेको गुनासो आउने गरेको उल्लेख गर्दै उनले त्यसको दीर्घकालीन समाधानका लागि अस्पताल प्रशासनले ठोस योजना बनाएर कार्यान्वयन गर्नुपर्ने धारणा व्यक्त गरे ।

ध्यानाकर्षण पत्र बुझ्दै लुम्बिनी प्रादेशिक अस्पतालका मेडिकल सुपरिन्टेन्डेन्ट डा. विष्णु गौतमले अस्पताल सुधारलाई उच्च प्राथमिकतामा राखेर काम गर्ने प्रतिबद्धता व्यक्त गरे । अस्पतालमा उपलब्ध स्रोत, साधन र जनशक्तिको अधिकतम सदुपयोग गर्दै सेवा प्रवाहलाई थप प्रभावकारी बनाइने उनले बताए ।

डा. गौतमले अस्पतालको समग्र सुधारका लागि अस्पताल प्रशासनको प्रयास मात्र पर्याप्त नहुने उल्लेख गर्दै संघ, प्रदेश र स्थानीय सरकार, सरोकारवाला निकाय, नागरिक समाज तथा सेवाग्राही सबै पक्षबीचको सहकार्य आवश्यक रहेको बताए । सबै पक्षको सहयोग र सुझावलाई सकारात्मक रूपमा ग्रहण गर्दै अस्पतालको सेवा गुणस्तरमा सुधार ल्याउन निरन्तर काम गरिने उनको भनाइ थियो ।

लुम्बिनी प्रादेशिक अस्पताल पश्चिम नेपालकै प्रमुख सरकारी स्वास्थ्य संस्थामध्ये एक हो । रुपन्देहीसहित कपिलवस्तु, नवलपरासी, पाल्पा, अर्घाखाँची, गुल्मी, प्युठान, रोल्पा, रुकुमलगायत जिल्लाका हजारौं नागरिक उपचारका लागि दैनिक रूपमा यस अस्पतालमा पुग्ने गरेका छन् । बिरामीको अत्यधिक चापका कारण सेवा व्यवस्थापनमा चुनौती देखिने गरेको भए पनि पछिल्ला वर्षहरूमा सेवा विस्तारका प्रयास भइरहेका छन् ।

स्वास्थ्य क्षेत्रमा बढ्दो जनअपेक्षा, प्रविधिको प्रयोग र गुणस्तरीय सेवाको आवश्यकतालाई मध्यनजर गर्दै अस्पतालको भौतिक पूर्वाधार, जनशक्ति, उपकरण तथा व्यवस्थापन प्रणालीमा समयानुकूल सुधार अपरिहार्य बन्दै गएको छ । यस्तो अवस्थामा विभिन्न राजनीतिक दल, नागरिक समाज तथा सरोकारवाला निकायबाट प्राप्त सुझाव र ध्यानाकर्षणलाई अस्पताल सुधारको अवसरका रूपमा उपयोग गर्नुपर्ने आवश्यकता देखिएको छ ।

पश्चिम क्षेत्रका नागरिकको भरोसाको केन्द्रका रूपमा रहेको लुम्बिनी प्रादेशिक अस्पताललाई अझ व्यवस्थित, आधुनिक र सेवाग्राहीमैत्री बनाउन अस्पताल प्रशासनसँगै संघ, प्रदेश तथा स्थानीय सरकारको समेत सक्रिय भूमिका आवश्यक देखिन्छ ।