सामग्री खोज्नुहोस्

 गुल्मी । गुल्मीको काली गण्डकी कोरिडोर अन्तर्गत रुद्रवेणी–पुर्तिघाट सडक खण्डमा मोटरसाइकल दुर्घटना हुँदा दुई जनाको मृत्यु भएको छ ।

दुर्घटनामा परी मृत्यु हुनेमा मोटरसाइकल चालक स्याङ्जा जिल्ला कालिगण्डकी गाउँपालिका –३ भुस्तुङ निवासी ३४ वर्षीय लक्ष्मण थापा र सोही ठाउँका ४५ वर्षीय गिरमान सिंह राना रहेको जिल्ला प्रहरी कार्यालय गुल्मीका प्रहरी नायव उपरीक्षक गङ्गा बहादुर सारुले जानकारी दिएका छन् ।

जिल्ला प्रहरी कार्यालय गुल्मीका अनुसार आइतबार राति करिब १० बजे सत्यवती गाउँपालिका –१ ठुलाबगर छल्दी स्थित रुद्रवेणीबाट चेमीतर्फ जाँदै गरेको लु ३६ प ३६२७ नम्बरको २२० सिसीको पल्सर मोटरसाइकल आफैँ अनियन्त्रित भई सडकबाट करिब तीन मिटर तल खस्दा दुर्घटना भएको हो ।

दुर्घटनामा गम्भीर घाइते भएका थापाको टाउकोमा गम्भीर चोट लागेको थियो भने रानाको टाउको र खुट्टामा गम्भीर चोट लागेको थियो । उनीहरू दुवै जनाको उपचारको क्रममा प्राथमिक स्वास्थ्य केन्द्र रिडीमा गए राति मृत्यु भएको प्रहरी जनाएको छ ।

दुर्घटनाको जानकारी प्राप्त हुनासाथ इलाका प्रहरी कार्यालय जोहाङबाट प्रहरी नायब निरीक्षक नरेन्द्रबहादुर विक र इलाका प्रहरी कार्यालय रिडीबाट प्रहरी निरीक्षक ज्ञानबहादुर माझीको नेतृत्वमा प्रहरी टोली तत्कालै घटनास्थल पुगेको थियो ।

प्रहरीले मोटरसाइकल नियन्त्रणमा लिएको जनाएको छ । मृतको शवलाइ आज बिहान घटना स्थलमा मुचुल्का गरी पोस्टमार्टमका लागि गुल्मी अस्पताल तम्घास ल्याई पुराइएको प्रहरीले जनाएको छ ।