खोज

रुपन्देही । माघीलाई विशेष पर्वको रुपमा मनाइने लुम्बिनीमा प्रदेश सरकारले माघ २ गते सार्वजनिक बिदा दिएको छ । आन्तरिक तथा कानून मन्त्रालयले माघ २ गते बिदा दिइएको जनाएको हो ।

लुम्बिनी प्रदेश सरकारले माघी महोत्सव मनाउने भएको छ । यही माघ २ गते मुख्यमन्त्री निवास परिसरमा विशेष समारोहको आयोजना गरी महोत्सव मनाउन लागेको हो ।

माघे संक्रान्ती/माघी पर्वका अवसरमा आयोजना हुने माघी मिलन कार्यक्रम २०७९ लाई विशेष र व्यवस्थित बनाउन मुख्यमन्त्री लीला गिरीले सचिवहरुलाई निर्देशन दिएका छन् ।

मुख्यमन्त्रीको अध्यक्षतामा शुक्रबार बसेको बैठकमा प्रमुख सचिव डा. दीपक काफ्ले र विभिन्न मन्त्रालयका सचिवहरुले मातहतका मन्त्रालयको अवस्थाका बारेमा जानकारी गराएका थिए ।

बैठकमा मन्त्रीहरु चेतनारायण आचार्य र कृष्णा केसीको पनि उपस्थिति थियो । मन्त्रालय र मातहतका कार्यालयहरुबाट हुने सेवा प्रवाहलाई चुस्त, दुरुस्त र पारदर्शी बनाउन मुख्यमन्त्रीले सचिवहरुलाई निर्देशन दिए ।

माघी महोत्वसका अवसरमा सांस्कृतिक झाँकी प्रदर्शन गर्ने, झाँकीहरुलाई उत्कृष्टताका आधारमा प्रोत्साहनस्वरुप पुरस्कृतसमेत गर्ने गरी तयारी भइरहेको आन्तरिक मामिला मन्त्रालयका सचिव कोमलप्रसाद धमलाले जानकारी दिए ।

महोत्सवका लागि मूल आयोजक समिति, व्यवस्थापन समितिलगायतका समितिहरु गठन गरिएको छ । माघी उत्सवका अवसरमा स्थानीय तहसँगको समन्वयमा २-२ वटा थारु र मगर झाँकी, १-१ वटा गुरुङ्ग र नेवार झाँकीको व्यवस्था मिलाउने, झाँकीको प्रस्तुति गर्ने टोलीलाई प्रतिटोली २० हजार रकम यातायात खर्चबापत मन्त्रालयले उपलब्ध गराउने सचिव धमलाले बताए ।

यसैगरी लुम्बिनी प्रदेश सरकारले माघ १ गते योग दिवस मनाउने भएको छ । योग, बैकल्पिक चिकित्सालगायतको प्रवर्द्धन गर्न प्रदेशमा विभिन्न कार्यक्रम गरिने भएको छ । माघ २ गते नै भूकम्प सुरक्षा दिवससमेत मनाउने गरी तयारी भइरहेको प्रदेश सरकारका प्रवक्ता चेतनारायण आचार्यले जानकारी दिए ।