खोज

काठमाडौँ ।

राष्ट्रिय स्वतन्त्र पार्टी (रास्वपा) र काठमाडौँ महानगरपालिकाका मेयर बालेन्द्र शाह (बालेन)बीच सम्भावित एकतापछि बन्ने पावर ब्यालेन्सबारे दुवै पक्ष छलफलमा जुटेका छन् ।

बालेन निकट एक स्रोतका अनुसार रास्वपाले प्रधानमन्त्रीको प्रस्ताव गरेपछि पार्टी एकताको सम्भावनासँगै पावर ब्यालेन्सको विषय उठेको हो ।

स्रोतले भन्यो, ‘रास्वपाले प्रधानमन्त्री प्रस्ताव गरेको हो । त्यसपछि पार्टी नै एक हुने हो भने पावर ब्यालेन्सको कुरा स्वाभाविक रूपमा आउँछ । त्यस विषयमा छलफल भइरहेको छ । बेलुकासम्म निचोड निस्कने सम्भावना छ । अहिले दुवै पक्षका दोस्रो तहका नेताहरू छलफलमा छन् । आजको नगर सभा सकिएपछि मेयर बालेन र रास्वपा सभापति रवि लामिछाने पनि छलफलमा बस्नुहुनेछ ।’

स्रोतका अनुसार रास्वपाको तर्फबाट उपसभापति डा. स्वर्णिम वाग्ले र शिशिर खनाल छलफलमा सहभागी छन् भने बालेनको तर्फबाट सचिवालय प्रमुख भूपदेव शाह र सल्लाहकार कुमार बेन सहभागी छन् ।

बालेन निकट स्रोतका अनुसार धेरै विषयमा प्रारम्भिक सहमति भइसकेको छ । ‘प्रधानमन्त्री बालेन बन्ने अवस्थामा रास्वपाभित्र बालेन कुन भूमिकामा रहने भन्ने कुरा स्पष्ट हुनुपर्छ । भविष्यमा पार्टी ठूलो बन्दै जाँदा शक्ति प्रयोगमा समस्या नआओस् भनेर अहिले नै यी विषय टुंग्याउन खोजिएको हो,’ उनले भने ।

बाहिर चर्चामा आएको बालेन र रवि लामिछानेको आलोपालो नेतृत्व गर्ने रास्वपाको प्रस्तावलाई भने बालेनको टिमले अस्वीकार गरेको स्रोतले जनाएको छ ।