खोज

भालुवाङ १० पुस ।

लुम्बिनी प्रदेश सरकार स्थायी राजधानी दाङ स्थानान्तरणको काम धमाधम भइरहेको छ । प्रदेश सरकार नै स्थायी राजधानी देउखुरीबाट सञ्चालन गर्ने गरी अहिले मन्त्रालय स्थापनादेखि संसद भवन सिंगारपटारको काम भइरहेको छ ।

गत मंसिर २८ गते मुख्यन्त्री तथा मन्त्रिपरिषद् कार्यालयको शुभारसम्मसँगै अस्थायी मुकाम बुटवलबाट मन्त्रालयहरु दाङ ल््याउने काम भइरहेको छ । पूर्वाधार विकास प्राधिकरणका अनुसार स्थायी राजधानी दाङको देउखुरीमा प्रदेश सरकारका १३ वटा मन्त्रालयमध्ये ६ वटा मन्त्रालय प्रशासनिक परिसरभित्र र बाँकी ७ वटा मन्त्रालय परिसर बाहिर स्थापना गरिएका छन् । राप्ती गाउँपालिमा रहेको तत्कालीन राप्ती प्राविधिक शिक्षालय परिसरमा प्रदेश सरकारको प्रशासनिक केन्द्र रहेको छ ।

‘मुख्यमन्त्री कार्यालयसँगै ६ वटा मन्त्रालय भित्र रहने छन्’– प्राधिकरणका प्रमुख कार्यकारी अधिकृत छविराज पोखरेलले भने, ‘बाँकी मन्त्रालयहरु बाहिर सरकारी भवनमा राखिनेछ ।’ उनले प्रदेश सरकार सञ्चालनका लागि सबैजसो मन्त्रालय स्थापना गरेर आन्तरिक व्यवस्थापनको काम भइरहेको बताए ।

स्थायी राजधानी देउखुरीमा मंसिर २८ मा मुख्यमन्त्री कार्यालय र त्यसअघि दुई वटा मन्त्रालय यसअघि नै स्थापना भइसकेका थिए । बाँकी रहेका ११ वटा मन्त्रालय पनि राजधानीमा स्थापना गरी अस्थायी मुकामबाट सामान सार्ने र व्यवस्थापनको काम चलिरहेको छ ।

प्राधिकरणका प्रमुख कार्यकारी अधिकृत पोखरेलका अनुसार लुम्बिनी प्रदेशको प्रशासनिक केन्द्र परिसरभित्र मुख्यमन्त्री तथा मन्त्रिपरिषद कार्यालयसँगै पर्यटन, ग्रामीण तथा शहरी विकास मन्त्रालय, आन्तरिक मामिला तथा सञ्चार मन्त्रालय, वन वातावरण तथा भूसंरक्षण मन्त्रालय, आर्थिक मामिला तथा सहकारी मन्त्रालय, भौतिक पूर्वाधार विकास मन्त्रालय स्थापना गरिएको छ ।

बाँकी रहेका उद्योग वाणिज्य तथा आपूर्ति मन्त्रालय, महिला बालबालिका तथा ज्येष्ठ नागरिक मन्त्रालय, शिक्षा तथा खेलकुद मन्त्रालय, श्रम तथा यातायात व्यवस्था मन्त्रालय, कृषि तथा भूमि व्यवस्था मन्त्रालय, ऊर्जा जलस्रोत तथा सिंचाइ मन्त्रालय र स्वाथ्य मन्त्रालय प्रशासनिक केन्द्र बाहिर स्थापना गरिएको छ ।

प्रदेश पूर्वाधार प्राधिकरणका अनुसार राप्ती गाउँपालिका वडा नं. १ को कार्यालय भालुबाङमा उद्योग वाणिज्य तथा आपूर्ति मन्त्रालय, वडा नं. २ को कार्यालयमा कृषि तथा भूमि व्यवस्था मन्त्रालय र गाउँपालिकाको कार्यालयमा महिला बालबालिका तथा ज्येष्ठ नागरिक मन्त्रालय र श्रम तथा यातायात मन्त्रालय राप्ती स्थापना गरिएको छ ।

त्यस्तै राप्ती गाउँपालिका वडा नं. ८ को कार्यालयमा शिक्षा तथा खेलकुद मन्त्रालय, वडा नं. ८ मा शिक्षा तथा खेलकुद मन्त्रालय वडा नं. ५ मा स्वास्थ्य मन्त्रालय स्थापना गरिएको छ । ऊर्जा जलस्रोत तथा सिंचाइ मन्त्रालय भने लमही नगरपालिका वडा नं. १ स्थित छात्रावासमा स्थापना गरिएको छ । मन्त्रालय राखिएको वडा कार्यालयलाई भने अन्यत्र सारिएको छ ।

प्रदेश पूर्वाधार विकास प्राधिकरणका प्रमुख कार्यकारी अधिकृत छविराज पोखरेलले स्थापना गरिएको मन्त्रालयमा बोर्ड टाँस्ने, कार्यालय भवन तयार पार्ने, फर्निचर मिलाउने जस्ता आन्तरिक व्यवस्थापनको काम चलिरहेको बताए । उनले मन्त्रालयहरु पूर्णरुपमा सञ्चालन आउन भने अझै केही समय लाग्ने बताए ।