खोज

काठमाडौँ ।

नेपाली कांग्रेसका केन्द्रीय सदस्य विनोद चौधरीले पार्टीभित्र टिकट बाँडफाँडलाई लिएर चलिरहेको विवादप्रति असन्तुष्टि जनाएका छन्। बिहीबार बसेको केन्द्रीय समितिको बैठकमा उनले आगामी निर्वाचनमा कसले टिकट बाँड्ने भन्ने विषयमा पार्टीभित्रै संघर्ष देखिनु दुःखद भएको टिप्पणी गरे।

चौधरीले भने, “हामी नेताहरूको विचार सुन्दा यस्तो लाग्छ कि अहिलेको लडाइँ टिकट बाँड्ने व्यक्तिबीचको मात्र होइन, भविष्यमा कसलाई टिकट दिने भन्ने सोचबीचको पनि हो। तर हाम्रो मुख्य चिन्ता त पार्टीलाई कसरी जिताउने भन्ने हुनुपर्ने हो। आज हामी यस्तो मानसिकतासँग चुनाव लड्न गइरहेका छौँ, जसले तीनवटै ठूला दललाई अस्वीकार गरिरहेको छ।”

उनले नेपाली कांग्रेसलाई अब रुपान्तरणको दिशामा लैजानुपर्ने आवश्यकता औंल्याए। चौधरीले भने, “अबको नेपाली कांग्रेस यस्तो पार्टी हुनुपर्छ, जसले पुरानो सोच चिर्दै नयाँ पुस्ताको भावना र बदलिँदो परिस्थितिलाई समेट्न सकोस्। देशका लागि योगदान गर्न चाहने आम नागरिकका लागि कांग्रेसले सबै ढोका खोल्नुपर्छ।”

उनले दस वर्षसम्म अवसरको प्रतीक्षा गर्नुपर्ने अवस्थाको अन्त्य गर्नुपर्ने बताउँदै थपे, “विभिन्न क्षेत्रका व्यक्तिहरू, सरकारी सेवाबाट वा व्यवसायिक क्षेत्रमा काम गरेका मानिसहरू नयाँ दल दर्ता गर्दै छन्। आम जनताको सोच धेरै अघि बढिसक्यो, तर हाम्रो सोच अझै पुरानै ढाँचामा अल्झिएको छ। के हामी बदलिँदो पुस्ता—जेनजी—लाई समेट्न तयार छौँ? त्यसको उत्तर अझै स्पष्ट छैन।”