खोज

रोल्पा, २ पुस ।

रोल्पावाट प्रतिनिधि सभा र प्रदेश सभामा प्रतिनिधित्व गर्ने ६ सांसद मध्ये ३ जना महिला रहेका छन् । प्रत्यक्षवाट निर्वाचित ३ र समानुपातिक पद्धतिमा छनौट भएका ३ समेत ६ पदमा ३ जना महिलाले प्रतिनिधित्व गरेका हुन् । एक प्रतिनिधि सभा निर्वाचन क्षेत्र रहेको रोल्पामा प्रत्यक्षतर्फ नेकपा माओवादी केन्द्रका वर्षमान पुन निर्वाचित भएका छन् ।

दुई प्रदेश सभा निर्वाचन क्षेत्र मध्ये प्रदेश सभा १ मा नेकपा माओवादी केन्द्रका जोखवहादुर महरा र प्रदेश सभा २ मा स्वतन्त्र उम्मेदवार दीपेन्द्र पुन निर्वाचित भएका छन् । प्रत्यक्षतर्फ सवै पुरुषको प्रतिनिधित्व हुँदा समानुपातिकमा भने महिला छनौट भएका छन् । प्रतिनिधि सभाको समानुपातिकतर्फ नेकपा एमालेका ईश्वरी घर्तीमगर छनौट भएकी छिन् । प्रदेश सभाको समानुपातिकतर्फ नेकपा एमालेका यमुना रोका र नेकपा माओवादी केन्द्रका मिना बुढा चयन भएका छन् । उनीहरु सवै आदीवासी जनजाती महिला क्लष्टरबाट छनौट भएका हुन् ।

यो संगै एक निर्वाचन क्षेत्र रहेको रोल्पावाट दुई जनाले प्रतिनिधि सभा सदस्यको रुपमा प्रतिनिधित्व गर्ने भएका छन । यसैगरी २ निर्वाचन क्षेत्र रहेको प्रदेश सभामा रोल्पावाट ४ जनाको प्रतिनिधित्व भएको छ ।

प्रत्यक्षतर्फ ठूला तीनदलले प्रतिनिधि सभा र प्रदेश सभामा महिला उम्मेवार उठाएका थिएनन् । राप्रपाले प्रतिनिधि सभाको प्रत्यक्षतर्फ लीला रावललाई उम्मेदवार वनाएको थियो । रावलले २ हजार ५५६ मत प्राप्त गरेर पराजित भएकी थिईन् । सधै पुरुषको मात्रै हालिमुहाली हुने रोल्पामा यस पटक प्रतिनिधि सभा र प्रदेश सभामा पचास प्रतिशत महिलाको प्रतिनिधित्व हुनु सुखद भएको महिला अधिकारकर्मी तीर्था आचार्यको भनाई छ । “जिल्लावाट कानुन निर्माण गर्ने ठाउँमा पचास प्रतिशत महिला पुग्नु खुसीको कुरा हो” आचार्यले भनिन् । “महिलालाई प्रत्यक्षमा अवसरै नदिने कृपा गरेर समानुपातिकमा राख्ने प्रचलन बढ्दै जानु महिला सशक्तीकरणको दृष्टिकोणले भने सुखद होईन्”–आचार्यको भनिन ।