खोज

दाङ, १९ मंसिर ।

घोराही खानेपानी उपभोक्ता तथा सरसफाई संस्थाको बहुप्रतिक्षित बबई लिफ्टिङ आयोजनाका लागि आवश्यक ऋण लगानीमा त्रिपक्षीय सम्झौतामा हस्ताक्षर गरेको छ ।

घोराही उपमहानगरपालिकामा एक कार्यक्रम गरी घोराही खानेपानी आयोजना बिस्तारका लागि आवश्यक बबई लिफ्टिङ आयोजनाको सम्झौता पत्रमा त्रिपक्षीय हस्ताक्षर भएको हो । हाल घोराही खानेपानी संस्थाले प्रदान गर्दै आएको खानेपानी वितरण सेवालाई स्तरीय तथा दीगो रुपमा लैजान बबई लिफ्टिङ आयोजना आवश्यक भएपछि सर्वे गरिएको आधारमा नेपाल सरकार, नगर विकास कोष र खानेपानी आयोजनाको सहलगानीमा आयोजना सम्पन्न गर्ने गरी त्रिपक्षीय सम्झौता पत्रमा हस्ताक्षर भएको छ । जसको मध्यस्थकर्ताका रुपमा घोराही उमहानगरपालिका रहेको छ ।

२०९७ सालसम्म ऋण भुक्तानी गरिसक्ने गरी पाँच प्रतिशत व्याज दरमा नेपाल सरकारको ७० प्रतिशत अर्थात ३४ करोड ८९ लाख ८४ हजार ३ सय, नगर विकास कोषको २५ प्रतिशत अर्थात १२ करोड ४६ लाख ३७ हजार २५० र सम्बन्धित संस्थाको सहलगानी पाँच प्रतिशत अर्थात २ करोड ४९ लाख २७ हजार ४५० गरी कुल ४९ करोड ८५ लाख ४९ हजार रुपैयाँको ऋण सम्झौता भएको छ ।

नगर विकास कोषले उपलब्ध गराएको ऋण वापतको रकमको हकमा ३ वर्षको सहुलियत अवधिसहित १ वर्षमा भुक्तान गरी सक्ने गरी सम्झौता भएको छ । यो व्यवस्था अर्धवार्षिक रुपमा मिलाउँदै हरेक वर्षको असार र पुसमा किस्ता भुक्तानी गर्ने गरी सम्झौता पत्रमा हस्ताक्षर भएको घोराही खानेपानी उपभोक्ता संस्थाका अध्यक्ष देवीबहादुर डिसीले जानकारी दिए ।

सो सम्झौता पत्रमा घोराही खानेपानी संस्थाका अध्यक्ष देवीबहादुर डिसी, नगर विकास कोषका कार्यकारी निर्देशक कृष्णप्रसाद सापकोटा र मध्यस्थकर्ताका रुपमा घोराही उपमहानगरपालिकाका नगरप्रमुख नरुलाल चौधरीले संयुक्त रुपमा सम्झौता पत्रमा हस्ताक्षर गरेका हुन् । सो आयोजना सम्पन्न भएमा आगामी ४० वर्षसम्म घोराहीमा खानेपानीको दीर्घकालीन समस्या समाधान हुनुका साथै नगरबासीले सहज रुपमा खानेपानी पाउने विश्वास गरिएको संस्थाका अध्यक्ष डिसीले बताए ।

कार्यक्रममा उपप्रमख हुमा डिसी, प्रमुख प्रशासकीय अधिकृत भोजप्रसाद घिमिरे, नगरविकास कोष प्रमुख सुवाशराज पन्त, प्रशासन प्रमुख सुर्यबहादुर कार्की, लेखा प्रमुख देवान राईलगायतले बोलेका थिए । कार्यक्रमको सहजीकरण संस्थाका सचिव धर्मेन्द्र श्रेष्ठले गरेका थिए ।

यसैबीच, बबई लिफ्टिङ खानेपानी आयोजना निर्माणका लागि गत असार २९ गते ठेक्का सम्झौता भई अब पुसको पहिलो हप्ताबाट कामको थालनी हुने भएको छ । आगामी ३ वर्षमा निर्माण कार्य सम्पन्न गर्ने गरी ठेक्का सम्झौता भएको छ ।

यो आयोजना अनुसार, बबई नदीको बोरिङ खन्दै समवेलमार्फत वडा नम्बर ७ मा बोरिङको पानी फिल्टर गरेर जम्मा गर्ने त्यसपछि रावतगाउँ, झिगौरालगायतका ठाउँमा ओभरहेड टंकीमा पानी जम्मा गर्दै थप ठाउँमा सहज रुपमा खानेपानी वितरण गर्ने लक्ष्य राखिएको छ ।

हाल ३ वटा ओभरहेड र ३ वटा आरबीटी टंकीमार्फत ८ हजार धारामार्फत घोराही खानेपानी उपभोक्ताको घरमा पानी पुर्याउने काम भइरहेको छ । यो आयोजना सम्पन्न भएमा थप १२ हजार धारामार्फत पानी वितरण गर्न सकिने भएको दावी गरिएको छ । यसरी घोराही खानेपानी उपभोक्ता तथा सरसफाई संस्थाले २० हजार धारमार्फत उपभोक्ताको घरमा खोपानी पुयाउने योजना बनाएको छ ।

खानेपानीको संकट चुलिँदै गएको बेलामा घोराही खानेपानी संस्थाले नगरबासीको मागलाई सम्बोधन गर्न यो आयोजना अघि सारेको हो । जसमा आयोजनाको सबैजसो कार्यक्रम रहेको संस्थाका अध्यक्ष डिसीले बताए । बढ्दो शहरीकरणका कारण पानीको श्रोत सुक्दै गएको बेलामा खानेपानीको संकट समाधानको सबैभन्दा उत्तम विकल्पका रुपमा लिएर यो अभियानमा घोराही उपमहानगरपालिकाले मध्यस्थकर्ताको रुपमा जमानी बसेको नगरप्रमुख नरुलाल चौधरीले बताए । एक घर एक धारा प्रदेश सरकारको नारालाई सार्थक बनाउन तथा नगरबासीलाई खानेपानीको पहुँचमा पुर्याउन यो अभियानले सहयोग गर्ने भएकाले उपमहानगर पनि काम सफल बनाउन तल्लीन रहेको उनको भनाई छ ।