खोज

बुटवल, २९ साउन ।
ग्रामीण विकास लघुवित्त वित्तीय संस्थाको ११औँ वार्षिकोत्सवको अवसरमा प्रधान कार्यालय बुटवलमा वृहत रक्तदान कार्यक्रम आयोजना गरिएको छ।

विहीबार नेपाल रेडक्रस सोसाइटी बुटवल रक्तसञ्चार सेवा केन्द्रको प्राविधिक सहयोगमा आयोजित उक्त कार्यक्रममा संस्थाका कर्मचारी तथा अन्य व्यक्तिहरूले सक्रिय सहभागिता जनाएका थिए। कार्यक्रममा संस्थाका प्रमुख कार्यकारी अधिकृत श्यामकुमार कटुवालले नेपाल रेडक्रस सोसाइटी बुटवल शाखाका वरिष्ठ प्राविधिक निरञ्जनराज भण्डारीसहित रक्तदाता कर्मचारीलाई ब्लड कलेक्सन ब्याग प्रदान गरी कार्यक्रमको उद्घाटन गरेका थिए।

संस्थाले शुक्रबार आफ्नो ११औँ वार्षिकोत्सवको अवसरमा लुम्बिनी प्रदेशअन्तर्गत रहेका ५० वटा शाखा कार्यालयमध्ये प्रत्येक शाखाबाट १ जना उत्कृष्ट ग्राहक सदस्यलाई नगदसहित पुरस्कृत गर्ने कार्यक्रम तय गरिएको संस्थाका ईश्वरलाल लम्सालले जानकारी दिए।

रक्तदान कार्यक्रममा संस्थाका उप–प्रमुख कार्यकारी अधिकृत दिपक पाण्डेसहित प्रधान कार्यालय बुटवल, सञ्चालन तथा सुपरिवेक्षण कार्यालय बुटवल र लुम्बिनी प्रदेशका विभिन्न जिल्लाका शाखा प्रबन्धक तथा कर्मचारीहरूको सहभागिता थियो। कार्यक्रममा ४१ युनिट रगत संकलन भएको छ।

नेपाल सरकारको ३० प्रतिशतभन्दा बढी लगानी रहेको साविकका क्षेत्रीय स्तरका पाँचवटा ग्रामीण विकास बैंक मर्जर भई बनेको राष्ट्रियस्तरको (घ) वर्गको यस ग्रामीण विकास लघुवित्त वित्तीय संस्था लिमिटेडले २०७१ साउन ३० गतेदेखि एकीकृत वित्तीय कारोबार सुरु गरी लघुवित्त सेवा उपलब्ध गराउँदै आएको छ।

देशभरका ७५३ वटा स्थानीय तहमध्ये ३६९ वटा स्थानीय तहमा यस संस्थाको सेवा पुगेको छ। हालसम्म यस संस्थाको कार्यक्रम ५६ जिल्लामा फैलिएको छ भने शाखा कार्यालयको संख्या १८९ पुगेको छ। संस्थाको प्रधान कार्यालय बुटवल उपमहानगरपालिका–१०, कालिकानगर, रुपन्देहीमा रहेको छ। विराटनगर, जनकपुर, बुटवल, नेपालगञ्ज र धनगढीमा यसको सञ्चालन तथा सुपरिवेक्षण कार्यालयहरू रहेका छन्।

संस्थाले ग्रामीण तथा दूरदराजका विपन्न र पिछडिएका वर्गमा वित्तीय पहुँच विस्तार गर्दै उनीहरूको आर्थिक तथा सामाजिक सशक्तीकरण र राष्ट्रिय गरिबी न्यूनीकरणमा प्रत्यक्ष योगदान दिँदै आएको छ।

आर्थिक वर्ष २०८०/८१ मा संस्थाको व्याज आम्दानी रु. १ अर्ब ८८ करोड ३३ लाख ५० हजार, अन्य सञ्चालन आम्दानी रु. ५ करोड ७० लाख ३० हजार, कर्जा नोक्सानी व्यवस्थाबाट फिर्ता आम्दानी रु. ३८ करोड ४८ लाख ५ हजार र गैर–सञ्चालन आम्दानी रु. ८ लाख ९३ हजार रही, जम्मा कुल आम्दानी रु. २ अर्ब ३२ करोड ६० लाख ७८ हजार भएको छ। यो अघिल्लो वर्षको सोही अवधिको तुलनामा २८.८३ प्रतिशतले वृद्धि भएको हो।