खोज

गुल्मी, २९ साउन ।

लगातारको वर्षाका कारण पहिरो गएपछि बुधबार बिहानदेखि अवरुद्ध बनेकोे कालीगण्डकी करिडोर सडक सञ्चालनमा आएको छ ।

कालीगण्डकी करिडोर सडक अन्तर्गत गुल्मीखण्ड अन्तर्गत कालीगण्डकी गाउँपालिका –२ स्थित राक्सेमा सडक माथिबाट चट्टान सहितको पहिरो खसेपछि उक्त सडक दुई दिनदेखि पुर्णरुपमा अवरुद्ध बनेको थियो ।

अवरुद्ध सडक सुचारु गर्नका लागि उक्त क्षेत्रमा काम गर्दै आएको सडक निर्माण कम्पनीले स्काभेटरको माध्यमबाट सडकमा थुप्रिएको पहिरो पन्छाएपछि केहीबेर अघिदेखि उक्त सडक पूर्ण रुपमा सञ्चालनमा आएको जिल्ला प्रहरी कार्यालय गुल्मीका सूचना अधिकरी गंगा बहादुर सारुले जानकारी दिएका छन ।

त्यसैगरी, अविरल वर्षाका कारण पहिरो जाँदा आज बिहानदेखि अवरुद्ध मदनभण्डारी राजमार्ग सडक अन्तर्गत गुल्मीको रिडी–तम्घास सडक भने अझै सञ्चालनमा आउन सकेको छैन । उक्त सडकखण्ड अन्तर्गत रुरुक्षेत्र गाउँपालिका –३ स्थित बाख्रे भीरमा सडक माथिबाट पहिरो खसेपछि सडक अवरुद्ध बनेको हो । अवरुद्ध सडक सञ्चालनका लागि प्रयास भइरहेपनि पानी पहिररहेको र सडक माथिबाट पहिरो खस्नेक्रम नरोकिएकोले सडक सुचारु गर्न समस्या परेको सूचना अधिकारी एवं प्रहरी नायव उपरिक्षक गंगाबहादुर सारुले बताए ।

सडक अवरुद्ध बनेपछि अहिले त्यस क्षेत्रमा रुरुक्षेत्र गाउँपालिका ‐ ३ स्थित पानी टंकीबाट थोर्गाहुँदै सालबिसौनाको वैकल्पीक सडक प्रयोग गरि सवारी साधनहरु सञ्चालन भैरहेका छन । मदनभण्डारी राजमार्ग अन्तर्गत रिडी–तम्घास सडकखण्डमा समानान्तर जेभी र ईलाईट कम्पनीद्वारा २५ किलोमिटर सडक फराकिलो र कालोपत्रको काम भैरहेको छ ।

गुल्मी सहित आसपासका क्षेत्रमा गत तीन दिनदेखि निरन्तर रूपमा हल्कादेखि मध्यम वर्षा भईरहेको छ । निरन्तर बर्षाका कारण बडिगाड खोला र कालीगण्डकी नदी किनारमा पानीको सतह बढ्दै गएको छ ।

बाढी र पहिरोको जोखिम बढ्न सक्ने भन्दै जिल्ला प्रशासन कार्यालय गुल्मीले तटीय क्षेत्रका नागरिकलाई सचेत रहन र सुरक्षित स्थानमा वसोवास गर्न आग्रह गर्दै आईरहेको छ ।