खोज

बुटवल, २८ साउन ।
दुबईमा सम्पन्न वल्र्ड सुपरमेसी ब्याटल ग्राउण्ड २०२५ मा तेस्रो स्थान हासिल गरेको ‘द ब्रेभ गोर्खास’ डान्स टिमलाई बुधबार बुटवलमा बधाई तथा सम्मान गरिएको छ । नाश्री डान्स एकेडेमीको आयोजनामा भएको कार्यक्रममा बुटवल उपमहानगरपालिकाका नगरप्रमुख खेलराज पाण्डेयले मायाको चिनो र सम्मानपत्रबाट टिमलाई सम्मान गरिएको हो । सो टिम काठमाण्डौमा सम्पन्न वर्ड डान्स नेपाल २०२५ को विजेता समेत रहेको छ ।

बुटवल उपमहानगरपालिकाका नगरप्रमुख पाण्डेयले देशकै नाम पहिचान गराउने काम भएको बताए । बुटवल नगर शिक्षा, खेलकुद, सास्कृतिक क्षेत्रमा अगाडी रहेको दाबी गर्दै उनले शिक्षा, स्वस्थ्यलाई निजि क्षेत्रको राम्रो लगानी रहेको समेत बताए ।

कार्यक्रममा एकेडेमीका प्रशिक्षक मनिष नेपालीले ढाई वर्षको अवधिमा टिम तयार भएर लागेको बताए । सात देखि २७ वर्ष उमेर समुहका सदस्यहरुलाई समेट्नु धेरै कठिनाईहरु आएको उनले बताए । नृत्य केवल मनोरन्जनको श्रोतका रुपमामात्र नभई साधना र तपस्या भएको उनले बताए । नृत्य एउटा मानव स्वस्थ्यसंग जोडिएको र औषधी मानिने उनले बताए । धेरै प्रतियोगिताको उपाधि र पुरस्कार क्षमताभन्दा पनि पैसासंग किन्ने रुपमा चिनिन लागेको उनले बताए । विश्वका २५ बढी देशका कलाकारहरु बिचमा प्रतिस्पर्धाबाट छनौट भई तेस्रो स्थान हासिल गर्नु कम मेहनत नरहेको एकेडेमीकी संचालक उषा खत्रीले बताउदै यो उपलब्धि अन्तराष्ट्रिय मंचमा नेपाली नृत्यमा उत्कृष्ट भएको दाबी गरिन ।

कार्यक्रममा प्रशिक्षक पुजा दर्नालले धेरै मेहनत र लगनका कारण सफलता हासिल गरेको भन्दै यसलाई निरन्तरता दिने प्रतिवद्घता जनाए । दुबईमा तेस्रो भएपछि धेरै खुशी भएको उनले आफनो अनुभव सुनाउदै सबै अभिभावकहरुको साथ र सहयोगबाट नै उपलब्धि हासिल भएको बताईन । नेपालबाट १० जना कलाकारसहितको टिम जाने तयारी गर्दा बुटवलबाट नृत्यमा प्रतिनिधित्व गर्ने सरकारबाट एउटा पत्रको माग गर्दा समेत उपलब्ध नभएको उनले दुखेसो गरे । ‘दुबई जादा श्रोत देखाउन नसक्दा कठिनाई भएको थियो ।’–उनले भने । नेपाली पंचेबाजामा हिपहपको स्ट्रिप स्लासा प्रर्दशन गरिएको उनले बताए ।

कार्यक्रममा वर्ड डान्स एकेडेमी नेपालका अध्यक्ष रोशन गहतराजले नृत्यबाट आफ्नो र आफ्नो क्षेत्रको पहिचान दिने काम गरेको बताए । धेरै मेहनत र निरन्तरता जरुरी रहने उनले बताए । कलाकार र नृत्यप्रति सरकारको दृष्टिकोण अझै पनि सकारात्मक नरहेको भन्दै उनले आफ्नै खर्चमै उपलब्धि हासिल गरेको बताए ।

कार्यक्रममा सुस्ता बचाउ युवा अभियानका संयोजक योगेन्द्र गौतमले युवा प्रतिभाबाट देशलाई अन्तराष्ट्रिय स्तरमा पहिचान दिलाउन सफल भएको बताए । ‘प्रशिक्षणको थलोलाई नया ढंगबाट अघि बढाउन जरुरी छ ।’– उनले भने ।