खोज

एक जना पत्रकारले प्रश्न गरे,
अर्जुन जी,
नेपाली हिन्दु नारीहरुको तीज पर्व अहिले जे जसरी मनाउन थालिएको छ, त्यसलाई तपाईं के भन्नुहुन्छ ?

मैले भने,
हार्ड न्यूजमा भनौं कि सफ्ट न्यूजमा ?
पत्रकारले भने,
हार्ड न्यूजमा भन्नुस् ।

अनि मैले भने,
कुनै विशेषण नलगाइकन तड्कारो रुपमा भन्छु ।
कत्ति ढुलमुल नगरिकन
कत्ति नहिच्किचाइकन
सत्य–सत्य, धर्म–धर्म, नढाँटिकन जे का ते भन्छु–
‘फेशन शो’
मात्र ‘फेशन शो’ ।
पत्रकारले अर्को प्रश्न गरे
राम्रो पोइ पाइन्छ भने के भो त भनेर
क्रान्ति
परिवर्तन
रुपान्तरण
जस्ता समयका अपेक्षालाई पनि थाती राखेर
पानी पनि नखाइकन
भोलेनाथ बाबाको कठोर वर्त बस्ने
आजकी विकासे कुमारी नानीलाई तपाईं के भन्नुहुन्छ ?

ती विकासे कुमारी नानीलाई म स्पष्ट भन्न चाहन्छु,
हेर नानी,
यो वर्त सर्तको नौटङ्की नगर
तिमी जतिसुकै कठोर वर्त बसेपनि
तिम्रो कठोर वर्त
विषादि हालेको अन्नपानी
ठाउँ–कुठाउँ बनेका लत्ताकपडा
अश्लील गायन
उच्छृंखल वाद्यवादनले गर्दा अशुद्ध छ ।
अशुद्ध छ भन्ने कुरा त्रिकालदर्शी भोलेबाबालाई पनि पक्कै थाहा छ ।
अनि फेरि
भोले बाबा फक्कड बाबा हुन्
आशुतोष पनि हुन्
आशुरोष पनि हुन्
छिट्टै खुशी भएर वरदान दिन पनि सक्छन््
छिट्टै रिसाएर सराप दिन पनि सक्छन्

जलवायु, अन्नपात, बोलीवचन, रहनसहन, पहिरन, तन, मन, धन सबै अशुद्धै अशुद्ध भएको बखत
तेरो वर्त अशुद्ध भयो भनेर आशुरोष भोले बाबाले सराप दिने बढी संभावना छ ।
तसर्थ तिमी,
तिनी फक्कड बाबालाई छोड
अलमल नगरिकन छोडिहाल ।
बरु,
तिम्रै कम्प्युटरमा
तिमी आफैले राखेको फेसबुक छ
फेसबुक माने अनुहारको पुस्तक
पुस्तक माने सरस्वती
हाम्रो आश्थामा साक्षात् सरस्वती देवी
सरस्वती देवी भनेरै हामी पुस्तकलाई ढोग्छौं
त्यसै पुस्तकको तिमी आरधना गर
उपासना गर
वर्त गर
पानी पनि नखाएर
एकाग्रचित्त भएर
श्रद्धा गर
त्यसै पुस्तकका अङ्गप्रत्यङ्गमा
क्लिक क्लिक गर
गरिराख
एक दिन न एक दिन फेस बुक खुशी हुन्छ
तिमीलाई च्वाक पोइ प्राप्त हुन्छ ।
यो कुरा पक्का ।
पत्रकारले फेरि प्रश्न गरे,
क्रृषिपञ्चमीमा अरुन्धतीसहित सप्तक्रृषिको पूजा गरेर आफ्ना पतिको दीर्घायु कामना गर्ने विवाहिता नारीलाई तपाईं के भन्नुहुन्छ ?

दिनदिनै औषधियुक्त दन्तमञ्जनले दाँत माझ्ने, शुद्ध कलको पानीमा स्नान गर्ने, आधुनिक औद्योगिक मसिनमा प्रशोधित अन्न, दूध, घिउ, फलफूल, तरकारी, मासु सेवन गर्ने हे विवाहिता भद्र महिला !
क्रृषिपञ्चमी पूजामा पवित्रताको नाममा

अव ३ सय ६५ वटा अपामार्गका दतिवनले एकै दिन एकमुष्ट दाँत माझ्ने नौटङ्की नगर
मलमूत्र मिसिएको फोहोरो किन नहोस्, त्यही कुवामा, त्यही पँधेरीमा स्नान गर्ने धृष्टता नगर
हलो पनि नलागेको, कोदालाले खनेर उब्जाएको शुद्ध अन्न मात्र खान्छु भन्ने स्वाङ् नगर ।
अब,
कोलगेट कम्पनीका टूथपेष्टहरुले तिम्रो अपामार्गका दतिवनको एकमुष्ट दन्तमञ्जनलाई,
फलाम र रबरका पाइपहरुमा सुसेली मार्दै बग्ने शुद्ध पानीका कलधाराहरुले ती कथित पवित्र कुवा र पँधेरीहरुलाई,
अनि
आधुनिक सेलर मेसिनबाट उत्पादित जिरामसिनो चामलले तिम्रो कोदाले अन्नलाई विस्थापित गरिसकेका छन् ।

जहाँसम्म पतिको दीर्घायुको कुरा छ
त्यसका लागि
अरुन्धतीसहित कुशका सातवटा क्रृषि बनाएर
तिनलाई चन्दन, अक्षता र फूल प्रसादले पूजाको नौटङ्की गर्न पर्दैन
साक्षी मात्र राख र प्रतिज्ञा गर
“अव उप्रान्त म मेरा पतिलाई कुनै प्रकारको ‘टेन्सन’ हुने कुनै काम गर्ने छैन ।”
साँच्चिकै यसो ग¥यौं र पतिलाई कुनै प्रकारको ‘टेन्सन’ दिइनौ भने
तिम्रा पतिको आयु अवश्य बढ्ने छ ।
                                                                                                                                                                                                               साउन २०८२, नारीहरुको वर्त बस्ने महिना