खोज

 काठमाडौं, २२ साउन ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले विद्यालय शिक्षा विधेयक पारित हुन ढिलाइ हुनुको दोष कांग्रेस र एमालेतर्फ लगाएका छन् ।

बिहीबार राष्ट्रिय सभागृहमा अनेरास्ववियु (क्रान्तिकारी) ले आयोजना गरेको विद्यार्थी संवाद कार्यक्रममा बोल्दै उनले एमाले नेतृत्व, विशेषतः प्रधानमन्त्री केपी शर्मा ओलीकै कारण विधेयक अघि बढ्न नसकेको बताएका हुन् ।

उनका अनुसार आफू प्रधानमन्त्री रहँदा नै विद्यालय शिक्षा विधेयक दर्ता भएको थियो र शिक्षकहरूसँग भएका सहमति र मागलाई विधेयकमा समेट्ने तयारी गरिएको थियो। तर, एमाले र प्रधानमन्त्री ओली त्यसको प्रतिवादमा उभिएकाले हालसम्म पनि विधेयक संसदमा प्रस्तुत हुन सकेको छैन ।

प्रचण्डले प्रधानमन्त्री ओलीमाथि शिक्षकहरूको सुविधा र हकहितलाई लिएर गालीगलौज गर्ने गरेको आरोप समेत लगाए। उनले भने, “शिक्षकहरूलाई सुविधा किन चाहियो भन्दै गाली गर्ने प्रधानमन्त्री उहाँ नै होइन? उहाँलाई ढाँटछल गर्न सिपालु मानिन्छ, तर शिक्षामा सुधार गर्ने मनसाय छैन । उहाँहरू नीजिकरणतिर लाग्नुभएको छ, सार्वजनिक शिक्षाको पक्षमा होइन ।”

उनले असार १५ भित्र विधेयक पारित गर्ने योजना भए पनि सरकारकै व्यवहारले गर्दा त्यो सम्भव नभएको जिकिर गरे । सबै दल र नेताहरू एउटै किसिमका हुन् भन्ने सार्वजनिक धारणा बनाउने प्रयासप्रति असहमति जनाउँदै उनले माओवादी पार्टी भने सधैं सार्वजनिक शिक्षा सुधारको पक्षमा अडिएको दाबी गरे ।