काठमाडौँ ।
भिजिट भिसा प्रकरणको छानबिनमा सरकार गम्भीर नदेखिएको भन्दै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले बुधबारको प्रतिनिधिसभा बैठक बहिस्कार गरेका छन्। दुवै दलले विशेष संसदीय छानबिन समिति वा उच्चस्तरीय न्यायिक छानबिन गठन नहुनु आपत्तिजनक भएको भन्दै बैठकमा सहभागी नभइ विरोध जनाएको हो।
सभामुख देवराज घिमिरेले बैठक सुरु भएको घोषणा गरेलगत्तै रास्वपा र राप्रपाका सांसदहरू उठेर विरोधमा उभिएका थिए। सभामुखले बोल्ने अवसर दिँदा रास्वपाका सांसद अशोक चौधरीले भिजिट भिसा प्रकरणको छानबिनका लागि समिति गठन नगरेसम्म बैठकमा सहभागी नहुने स्पष्ट पारे।
त्यसपछि राप्रपा अध्यक्ष राजेन्द्र लिङ्देनले पनि विगतदेखि उठाउँदै आएको माग सरकारले बेवास्ता गरेकाले उनीहरू विरोधमा रहेको बताए। उनले भिजिट भिसासम्बन्धी गम्भीर अनियमितता र शंकास्पद गतिविधि भएको दाबी गर्दै निष्पक्ष छानबिनको माग गरे।
दुवै पार्टीका सांसदहरूले आफ्ना धारणा राखेपछि बैठक बहिस्कार गर्दै सदन कक्षबाट बाहिरिएका छन्। रास्वपा र राप्रपाले हालैका दिनमा संसदमा निरन्तर यस मुद्दामा आवाज उठाउँदै आएका छन्। तर सरकार र सत्तारुढ दलहरूबाट ठोस कदम नचालिएको उनीहरूको आरोप छ।
