खोज

काठमाडौँ।

गृहमन्त्रालयले भिजिट भिसा प्रकरणबारे छानबिन गर्न उच्चस्तरीय समिति गठन गरेको छ। मंगलबार प्रतिनिधि सभा बैठकलाई सम्बोधन गर्दै गृहमन्त्री रमेश लेखकले समितिले ९ वटा स्पष्ट कार्यदेश प्राप्त गरेको जानकारी गराए।

सोमबार राति मन्त्रिपरिषद्ले पूर्वमुख्यसचिव शंकरदास वैरागीको संयोजकत्वमा सम्बन्धित मन्त्रालयका सहसचिव सदस्य रहने गरी समिति गठन गरेको थियो। मन्त्री लेखकले समितिले प्रस्तुत गर्ने प्रतिवेदनलाई आधार मानेर आवश्यक कारबाही अघि बढाइने पनि बताएका छन्।

समितिले पाउने ९ कार्यदेश यसप्रकार छन्:

१. विदेश जाने र आउने यात्रुको सहजीकरण, विशेषगरी भिजिट भिसा सम्बन्धी समस्या समाधानका लागि नीति, कानुन र संरचनामा सुधार गर्ने दीर्घकालीन र तत्कालीन योजना बनाउने।
२. प्रचलित ऐन, नियमावली र मापदण्डमा आवश्यक संशोधनको मस्यौदा तयार गर्ने।
३. संरचनागत सुधार र कर्मचारी व्यवस्थापनमा सुधारका लागि सुझाव प्रस्तुत गर्ने।
४. सम्बन्धित निकायहरू बीच समन्वय र सहकार्यका लागि सुधार प्रस्ताव गर्ने।
५. अन्तर्राष्ट्रिय असल अभ्यासको अध्ययन गरी नेपालमा लागू गर्न सकिने उपायहरू सुझाउने।
६. अवैध बसाइ र अन्य भिसा सम्बन्धी समस्याको रोकथामका लागि अध्ययन गरी उपाय सुझाउने।
७. प्रविधिमैत्री र छरितो सेवा प्रवाहका लागि सुधारका सुझाव दिने।
८. सरोकारवाला निकायहरूको भूमिका व्यवस्थित गर्न सुझाव दिने।
९. आवतजावत अभिलेख सुरक्षित राख्न आवश्यक उपायहरू सुझाउने।