खोज

 काठमाडौं ।

राष्ट्रिय योजना आयोगका उपाध्यक्ष प्रा. डा. शिवराज अधिकारी र नेपालका लागि संयुक्त अधिराज्य (बेलायत)का राजदूत रोब फेनबीच सिंहदरबारस्थित आयोगमा भेटवार्ता भएको छ। सोमबार सम्पन्न उक्त भेटमा दुई देशबीचको आपसी सहयोग, योजना कार्यान्वयन, अनुसन्धान तथा वातावरणीय विषयहरूमा छलफल भएको आयोगले जनाएको छ।

भेटका क्रममा उपाध्यक्ष अधिकारीले हाल कार्यान्वयनको चरणमा पुगेको सोह्रौँ योजना अघिल्ला योजनाभन्दा विषयगत दृष्टिकोणबाट फरक ढंगले तयार पारिएको जानकारी गराउँदै त्यसको सफल कार्यान्वयनका लागि मन्त्रालयहरूसँग समन्वयात्मक रूपमा कार्य योजना बनाइँदै गरेको जानकारी दिए।

राजदूत फेनले आफ्नो देशमा नीति निर्माण तथा कार्यान्वयनको प्रक्रिया पनि साझा समस्या समाधानको साझेदारीमा आधारित हुने बताएका थिए। उनले आयोगको कार्ययोजनाको प्रशंसा गर्दै नेपालमा वैदेशिक लगानीकर्ताहरूका लागि अनुकूल वातावरण निर्माण गर्न आग्रह गरे।

राजदूत फेनले जलवायु परिवर्तनले नेपालमा पार्न सक्ने असर कम गर्न मिलेर काम गर्न आवश्यक रहेको धारणा राखे। साथै, शैक्षिक, अनुसन्धान र आर्थिक क्षेत्रमा दीर्घकालीन सहकार्य विस्तार गर्न संयुक्त अधिराज्य इच्छुक रहेको बताए।

नेपाल अति कम विकसित मुलुकको सूचीबाट स्तरोन्नति भएपछि भोग्नुपर्ने व्यापारिक चुनौतीहरूको समाधानमा पनि सहयोग गर्ने प्रतिबद्धता उनले जनाए। दुवै पक्षबीच नेपालको नीति निर्माण, योजना कार्यान्वयन, अनुसन्धान तथा वातावरणीय विषयमा द्विपक्षीय सहकार्य विस्तार गर्ने सहमति बनेको आयोगले जनाएको छ।