सामग्री खोज्नुहोस्

काठमान्डौँ ।

रसुवाको भोटेकोशी क्षेत्रमा आएको विनाशकारी बाढीपहिरोका कारण सुरुङभित्र थुप्रिएको माटो, ढुंगा तथा अन्य सामग्री हटाएर उद्धार तथा खोजी कार्य अघि बढाउन तीनदेखि चार महिनासम्म लाग्न सक्ने नेपाली सेनाका अधिकारीले बताएका छन् ।

धुन्चे उत्तरको फिल्ड अपरेसन कमाण्डको जिम्मेवारी सम्हालेका उज्वलविक्रम राणाले सुरुङभित्रको अवस्था अत्यन्त जटिल रहेकाले दुई–तीन दिनमै सबै सामग्री हटाएर सहज रूपमा उद्धार कार्य अघि बढाउन सकिने अवस्था नरहेको बताए ।

सुरुङभित्र थुप्रिएको सामग्रीको मात्रा र अवस्थालाई हेर्दा त्यसलाई पूर्ण रूपमा हटाउन तीनदेखि चार महिनासम्म लाग्न सक्ने उनको आकलन छ ।

‘टनेलभित्र जम्मा भएका सबै सामग्री दुई–तीन दिनमै निकाल्न सकिने सम्भावना देखिँदैन । त्यसलाई तीनदेखि चार महिनामा पनि निकाल्न नसकिने अवस्था मैले आफैंले देखेको छु,’ उनले भने ।

उनका अनुसार जिम्मेवारी क्षेत्रभित्र जलविद्युत् आयोजनाका चारवटा सुरुङ छन् । तीमध्ये रसुवागढी जलविद्युत् आयोजनाको सुरुङमा उद्धार तथा खोजी कार्य अघि बढाउन कठिन भएपछि काम रोकिएको छ ।

सुरुङको तल्लो भागसम्म पानी तथा अन्य सामग्री भरिएको र त्यहाँ जीवित व्यक्ति भेटिने सम्भावना न्यून देखिएपछि सम्बन्धित आयोजनाका इन्जिनियरसँगको समन्वयमा उक्त सुरुङमा खोजी तथा उद्धार कार्य रोकिएको उनले बताए ।

चिलिमे आयोजनाको सुरुङमा भने उद्धार तथा खोजी कार्य जारी रहेको सेनाले जनाएको छ । त्यहाँ अझै पनि जीवित व्यक्ति भेटिन सक्ने सम्भावनालाई ध्यानमा राख्दै टोली परिचालन गरिएको छ ।

लाङटाङतर्फको सुरुङमा पनि नेपाली सेनाको टोली ६४ मिटरसम्म प्रवेश गरेको थियो । त्यसपछि सुरुङ साँघुरिँदै गएर मानिस छिर्नसमेत कठिन हुने अवस्था देखिएपछि थप अगाडि बढ्न नसकिएको राणाले बताए ।

सुरुङभित्र करिब दुई फिट मात्रै खाली ठाउँ रहेको र घिस्रिएर अघि बढ्नुपर्ने अवस्था रहेकाले उद्धार कार्य थप जोखिमपूर्ण बनेको उनको भनाइ छ ।

यसैगरी, २१६ नम्बरको सुरुङमा पनि आजदेखि पुनः उद्धार प्रयास थालिएको छ । यसअघि पाँच पटकसम्म सुरुङभित्र प्रवेश गर्ने प्रयास गरिए पनि छातीसम्म आउने गरी सामग्री जमेकाले टोली अघि बढ्न सकेको थिएन ।

बाढीपहिरोबाट सबैभन्दा बढी प्रभावित क्षेत्र टिमुरे र स्याफ्रुबेंसी रहेको सेनाले जनाएको छ । नदी तथा खोलाको बहावले कतिपय क्षेत्रमा पाँच मिटरसम्मको तहमा क्षति पुर्‍याएको र स्याफ्रुबेंसीमा आधाभन्दा बढी बस्ती बगाएको अवस्थामा देखिएको अधिकारीले बताए । टिमुरेमा पनि ठूलो क्षति पुगेको छ ।

सडक तथा सञ्चार सम्पर्क विच्छेद भएकाले प्रभावित क्षेत्रमा आवतजावतका लागि हाल हवाई उद्धार नै प्रमुख माध्यम बनेको छ ।

‘बाटोको समस्या छ, खोलाले सबै बाटो लगेको छ। त्यसले गर्दा मेसिन लैजान नसकिएको हो । तर मेसिन गए पनि टनेलभित्र जमेको सामग्रीको अवस्था हेर्दा दुई–तीन दिनमै काम सकिने अवस्था छैन,’ उनले भने ।