सामग्री खोज्नुहोस्

रोल्पा । अविरल वर्षापछि आएको पहिरोले घर पुरिँदा रोल्पाको सुनछहरी गाउँपालिका–२ फलबाङमा एक जनाको शव भेटिएको छ भने तीन जना बेपत्ता भएका छन् ।

शुक्रबार राति आएको पहिरोले स्थानीय वीरबहादुर घर्ती मगरको घर पूर्ण रूपमा पुरिँदा घरमा रहेका चार जनामध्ये एक जनाको शव भेटिएको र तीन जना अझै बेपत्ता रहेको प्रहरीले जनाएको छ ।

लगातारको वर्षाका कारण सुनछहरी गाउँपालिका–२ फलबाङमा शुक्रबार राति पहिरो खसेको थियो । पहिरोले वीरबहादुर घर्ती मगरको घर पूर्ण रूपमा पुरिएपछि घरभित्र रहेका चार जनाको अवस्था अज्ञात भएको थियो । घटनाबारे शनिबार बिहान करिब ८ः१० बजे प्रहरी चौकी गाममा सूचना प्राप्त भएको प्रहरीले जनाएको छ ।

सूचना प्राप्त हुनासाथ प्रहरी सहायक निरीक्षक मकर रासकोटीको कमान्डमा प्रहरी टोली घटनास्थलतर्फ परिचालन गरिएको थियो । प्रहरी टोली बिहान करिब ९ बजे घटनास्थलमा पुगेको थियो । घटनास्थलमा पुगेर प्रारम्भिक जानकारी लिँदा उक्त घरमा वीरबहादुर घर्ती मगर र उनकी श्रीमती शनि घर्ती मगर बस्दै आएको तथा छिमेकी ललि घर्ती मगरसमेत सोही रात घरमा बस्न गएको खुलेको प्रहरीले जनाएको छ ।

पहिरोले घर पुरिएपछि घरमा रहेका चार जनामध्ये एक जनाको शव भेटिएको र तीन जना बेपत्ता रहेको जिल्ला प्रहरी कार्यालय रोल्पाका सूचना अधिकारी कृष्ण श्रेष्ठले बताएका छन् । उनका अनुसार पहिरो हटाएर बेपत्ताको खोजी तथा उद्धार कार्यलाई निरन्तरता दिइएको छ । स्थानीय बासिन्दा र प्रहरीको सहयोगमा पहिरो पन्छाउँदै बेपत्ता भएका व्यक्तिहरूको खोजी भइरहेको उनले बताए ।

श्रेष्ठले घटनास्थलमा प्रहरी टोली पुगे लगत्तै खोजी तथा उद्धारको काम सुरु गरिएको बताएका छन् । पहिरोले घर पूर्ण रूपमा पुरिएका कारण बेपत्ता व्यक्तिको खोजीमा कठिनाइ भइरहेको उनले बताए । घटनास्थलमा माटो, ढुङ्गा तथा अन्य भग्नावशेष हटाउँदै सम्भावित स्थानमा खोजी कार्य भइरहेको उनले बताएका छन् ।

यसैबिच सुनछहरी गाउँपालिका–२ कै गिट्ठेमा स्थानीय लादे बुढा मगरको घरसमेत पहिरोले पुरिएको जानकारी प्राप्त भएको प्रहरीले जनाएको छ । उक्त घटनाको जानकारी प्राप्त भएपछि प्रहरी चौकी सिउरीबाट प्रहरी सहायक निरीक्षक लालबहादुर पाण्डेको कमान्डमा प्रहरी टोली घटनास्थलतर्फ खटाइएको छ ।

गिट्ठेमा पहिरोले घर पुरिएपछि भएको मानवीय तथा भौतिक क्षतिको पूर्ण विवरण भने आउन बाँकी रहेको प्रहरीले जनाएको छ । घटनास्थलतर्फ खटिएको प्रहरी टोलीले त्यहाँ पुगेर क्षतिको विवरण सङ्कलन गर्ने तथा आवश्यक उद्धार कार्य अघि बढाउने प्रहरीले जनाएको छ ।

अविरल वर्षाका कारण रोल्पाका विभिन्न पहाडी क्षेत्रमा पहिरोको जोखिम बढेको प्रहरीले जनाएको छ । भिरालो जमिन तथा कमजोर भू–भागमा लगातार वर्षा भइरहेकाले पहिरो खस्ने सम्भावना बढेको भन्दै प्रहरीले स्थानीयलाई सतर्क रहन आग्रह गरेको छ ।

फलबाङमा पहिरोमा परी बेपत्ता भएका तीन जनाको खोजी कार्य जारी रहेको छ । पहिरोले पुरिएको घरबाट एक जनाको शव भेटिए पनि बेपत्ता तीन जनाको अवस्था पत्ता लाग्न सकेको छैन । स्थानीय बासिन्दा र प्रहरीको सहयोगमा पहिरो हटाउँदै बेपत्ताको खोजी तथा उद्धार कार्य भइरहेको प्रहरीले जनाएको छ ।

प्रहरीका अनुसार घटनाबाट भएको क्षति, भेटिएको शवको पहिचान तथा बेपत्ता व्यक्तिको अवस्थाबारे थप विवरण सङ्कलन भइरहेको छ । उद्धार कार्य जारी रहेकाले थप विवरण प्राप्त भएपछि सार्वजनिक गरिने प्रहरीले जनाएको छ ।