सामग्री खोज्नुहोस्

बुटवल । राष्ट्रिय प्रजातन्त्र पार्टी राप्रपाका नेता तथा सांसद ज्ञानेन्द्र शाहीले सार्वजनिक पदमा बसेका सबै व्यक्तिको सम्पत्तिको निष्पक्ष छानबिन गर्न सरकारसँग माग गरेका छन्। सोमबार बुटवलमा आयोजित पत्रकार सम्मेलनमा उनले सुशासनका नाममा विपक्षीमाथि मात्र अनुसन्धान भइरहेको आरोप लगाउँदै बहालवाला प्रधानमन्त्री, गृहमन्त्री, मन्त्री, सांसद तथा पूर्वमेयरहरूसमेत सबैको सम्पत्तिको समान रूपमा छानबिन हुनुपर्ने बताए।शाहीले भने, “सम्पत्ति छानबिन गर्ने हो भने सबैको गर्नुपर्छ। आफ्नै सम्पत्ति नहेरी अरूको मात्रै छानबिन गर्नु गलत हो। सरकार आफैंबाट सुरु गर्नुपर्छ।”

उनले पछिल्ला दिनमा काठमाडौंको न्युरोड, सञ्चारमाध्यमका कार्यालय तथा केही राजनीतिक नेताहरूको घरअगाडि भएका गतिविधिलाई योजनाबद्ध भएको दाबी गर्दै गृहमन्त्री सुदन गुरुङले आफ्ना समर्थक परिचालन गरेको आरोप लगाए। यद्यपि, उक्त आरोपलाई पुष्टि गर्ने आधिकारिक प्रमाण भने सार्वजनिक भएको छैन।नेपाल प्रहरीलाई राजनीतिक प्रभावबाट मुक्त भएर कानुनअनुसार काम गर्न आग्रह गर्दै उनले प्रहरी महानिरीक्षक दानबहादुर कार्कीलाई निष्पक्ष भूमिका निर्वाह गर्न अपिल गरे।

शाहीले राष्ट्रिय स्वतन्त्र पार्टीका केही नेताहरू छोटो समयमै ठूलो सम्पत्तिका मालिक बनेको दाबी गर्दै त्यसबारे पनि निष्पक्ष अनुसन्धान हुनुपर्ने बताए। साथै, काठमाडौं महानगरपालिकाका पूर्वमेयरहरूको सम्पत्तिसमेत अनुसन्धानको दायरामा ल्याउनुपर्ने उनको भनाइ थियो।सुकुम्बासी व्यवस्थापनका विषयमा उनले नदी किनार र सार्वजनिक जग्गाको अतिक्रमण हटाउनुपर्नेमा राप्रपा स्पष्ट रहेको उल्लेख गर्दै वैकल्पिक व्यवस्था नगरी गरिब तथा सुकुम्बासीलाई हटाउनु अमानवीय हुने धारणा राखे।

देशको अर्थतन्त्र कमजोर बन्दै गएको, व्यवसायी त्रसित भएको र राज्यका निकायहरू प्रणालीभन्दा बाहिर सञ्चालन भइरहेको आरोप लगाउँदै शाहीले विधिको शासन र समान कानुनी व्यवहार कायम गर्न सरकारसँग आग्रह गरे। उनका अनुसार सार्वजनिक पदमा बसेका सबै व्यक्तिमाथि एउटै मापदण्ड लागू भए मात्र सुशासनको दाबी विश्वसनीय बन्न सक्छ।