सामग्री खोज्नुहोस्

काठमाडौं । काठमाडौं जिल्ला अदालतले बहुचर्चित नक्कली भुटानी शरणार्थी प्रकरणमा फैसला सुनाउँदै पूर्वउपप्रधानमन्त्री टोपबहादुर रायमाझी का छोरा सन्दीप रायमाझी र पूर्वगृहमन्त्री रामबहादुर थापा ‘बादल’ का छोरा प्रतीक थापा लाई सफाइ दिएको छ। उनीहरूसँगै रामशरण केसी, टंककुमार गुरुङ, लक्ष्मी महर्जन, केशव तुलाधर र आशिष बुढाथोकी ले पनि अदालतबाट सफाइ पाएका छन्।

काठमाडौं जिल्ला अदालतका न्यायाधीश तेजबहादुर खड्का को इजलासले मंगलबार सुनाएको फैसलाअनुसार पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण, पूर्वगृहसचिव टेकनारायण पाण्डे लगायत १५ जनालाई विभिन्न कसुरमा दोषी ठहर गरेको छ। उनीहरूको सजाय निर्धारणका लागि असार २९ गते अर्को पेसी तोकिएको छ।

सरकारी वकिलको कार्यालयले २०८० जेठ १० गते रायमाझी, खाँण, पाण्डेलगायत ३० जनाविरुद्ध ठगी, सरकारी लिखत किर्ते, राज्यविरुद्धको अपराध, संगठित अपराध तथा एकीकृत कसुरअन्तर्गत मुद्दा दायर गरेको थियो। फैसलाअनुसार टोपबहादुर रायमाझी राज्यविरुद्धको कसुर, ठगी तथा संगठित अपराधमा दोषी ठहर भएका छन्। बालकृष्ण खाँण लाई ती कसुरमा मतियारको भूमिका रहेको ठहर गरिएको छ। त्यस्तै, टेकनारायण पाण्डे लाई ठगी, संगठित अपराध तथा राज्यविरुद्धको कसुरमा दोषी ठहर गरिएको छ।

भुटानी शरणार्थी नेता टेकनाथ रिजाल लाई सरकारी लिखत किर्ते, ठगी र संगठित अपराधमा मतियार बनेको तथा राज्यविरुद्धको कसुरमा पनि मतियारको भूमिका खेलेको भन्दै अदालतले दोषी ठहर गरेको छ। यसैगरी, प्रकरणका मुख्य योजनाकारका रूपमा आरोपित सानु भण्डारी र केशव दुलाल लाई सरकारी लिखत किर्ते, ठगी, संगठित अपराध तथा राज्यविरुद्धको कसुरमा दोषी ठहर गरिएको छ।

बहुचर्चित नक्कली भुटानी शरणार्थी प्रकरणमा आएको यो फैसला नेपालको न्यायिक तथा राजनीतिक वृत्तमा महत्वपूर्ण मानिएको छ। अब दोषी ठहर भएका प्रतिवादीहरूको सजाय निर्धारण अदालतले आगामी असार २९ गते गर्नेछ।